اسلام آباد ( بيورو رپورٽ) وزير اعظم عمران خان ٽوئٽ بيان ۾ دعويٰ ڪئي آهي ته 20 ڏينهن ۾ کنڊ جي قيمت ۾ في ڪلو 20 رپيا لاٿ ٿي آهي. عمران خان چيو آهي ته حڪومت جي اثرائتي مداخلت سبب کنڊ جي قيمتن ۾ لاٿ ٿي آهي، صوبن کي ڪمند جون رهتون ڏيڻ لاءِ هدايتون جاري ڪيون آهن، ڪمند جي ڪريشنگ وقت سر يقيني بڻائي وڃي.
لاهور (مانيٽرنگ ڊيسڪ) پي ڊي ايم طرفان 13 ڊسمبر تي لاهور جي مينارِ پاڪستان گرائونڊ تي جلسو ڪرڻ جو فيصلو، لاهور ۾ احسن اقبال جي صدارت هيٺ اجلاس دوران جلسي جي تيارين تي صلاح مشورا، اجلاس بعد نواز ليگ اڳواڻ راڻا ثناءُ الله چيو آهي ته اُميد آهي ته حڪومت هاڻي هوش کان ڪم وٺندي، جلسي ۾ ڪوبه ٽڪراءُ يا حادثو ٿيو ته ذميوار حڪمران هوندا، پي ڊي ايم جو جلسو جعلي حڪومت خلاف ريفرنڊم ثابت ٿيندو، جي يو آءِ اڳواڻ مولانا غفور حيدري چيو آهي ته حڪومت کي گهر ڀيڙو ڪرڻ لاءِ اسلام آباد به وڃي سگهون ٿا، ڪٺ پُتلي حڪمرانن جو ڄمي مقابلو ڪرڻ سميت کين شڪايت ڏينداسين، پ پ اڳواڻ چوڌري منظور چيو آهي ته اپوزيشن جي جلسن آڏو رنڊڪ پيدا نه ڪرڻ واري شبلي فراز جي اعتبار نه آهي، حڪومتي وزير ۽ مشير ڪوڙ مٿان ڪوڙ ڳالهائيندا آهن....
اسلام آباد (بيورو رپورٽ) سي پيڪ اٿارٽي جي قيام لاءِ جاري ڪيل آرڊيننس جي مدت ختم ٿيڻ کان پوءِ به سي پيڪ اٿارٽي ۽ ليفٽيننٽ جنرل (ر) عاصم سليم باجوا سي اٿارٽي جي چيئرمين جي عهدي تي برقرار هجڻ جو انڪشاف ٿيو آهي، توانائي وزارت جي پڌرائي موجب پاڪ چين اقتصادي راهداري تحت آزاد پتڻ بجلي گهر منصوبي جي تعمير لاءِ معاهدي تي صحيحون ڪيون ويون، ان منصوبي ۾ هڪ ارب 35 ڪروڙ ڊالرن جي سرمائيڪاري ٿيندي، 700 ميگاواٽ بجلي پيداوار لاءِ بجلي گهر قائم ٿيندو، معاهدي جي تقريب ۾ آزاد ڪشمير جي وزيراعظم راجا فاروق حيدر، توانائي جي وفاقي وزير عمر ايوب، رٿابندي جي وفاقي وزير اسد عمر، سي پيڪ اٿارٽي جي چيئرمين ليفٽيننٽ جنرل (ر) عاصم سليم باجوا ۽ ٻين عملدارن شرڪت ڪئي، ان معاهدي تي آزاد ڪشمير جي حڪومت، بجلي جي وفاقي سيڪريٽري ۽ آزاد پتڻ پاور پرائيويٽ لميٽيڊ جي سي اي او پاران صحيحون ڪيون، ياد رهي ته رٿابندي جي وفاقي وزير اسد عمر غير ملڪي ميڊيا کي انٽرويو ڏيندي اها تصديق ڪئي هئي ته سي پيڪ اٿارٽي جي قيام لاءِ آرڊيننس جي مدت ختم ٿيڻ کان پوءِ هينئر سي پيڪ اٿارٽي توڙي ليفيننٽ جنرل (ر) عاصم سليم باجوا سي پيڪ اٿارٽي جي چيئرمين جي عهدي تي موجود ناهي، پر ان باوجود عاصم سليم باجوا ڪالهه سي پيڪ اٿارٽي جي چيئرمين جي حيثيت ۾ ان معاهدي جي تقريب ۾ شرڪت ڪئي.
ڪراچي (اسٽاف رپورٽر) اسٽيل ملز جي ساڍا 4 هزار ملازمن جي برطرفي وارو فيصلو سنڌ هاءِ ڪورٽ ۾ چئلينج ڪيو ويو. برطرف ملازمن درخواست ۾ وفاقي سرڪار، اسٽيل ملز انتظاميا ۽ ٻين کي ڌُر بڻايو. ملازمن جي برطرفي غيرقانوني قرار ڏيڻ ۽ اسٽيل ملز جي زمين بابت جاچ جو حڪم ڏيڻ جي استدعا ڪئي وئي. صوبائي وزير سعيد غني اسٽيل ملز جي برطرف ملازمن جي وفد سان ملاقات دوران چيو ته سنڌ سرڪار اسٽيل ملز جي ملازمن سان گڏ آهي، ملازمن جا مسئلا حل ڪرڻ لاءِ جلد هڪ ڪميٽي جوڙي ويندي، وفاقي سرڪار آڏو به ملازمن جا پيش ڪيا ويندا.
ڪراچي (اسٽاف رپورٽر) گورنر عمران اسماعيل طرفان ڪراچي جي ڊائو اسپتال ۾ نينگري مديحه جو آپريشن اڌ ۾ ڇڏڻ واري واقعي جو نوٽيس، ڊائو يونيورسٽي جي وي سي سان فون تي رابطي دوران جاچ جي هدايت، گورنر جو چوڻ آهي ته مديحه جي علاج لاءِ سمورا وسيلا ڪتب آندا ويندا، هاڻي سندس حالت خطري کان ٻاهر آهي، سندس آپريشن اڌ ۾ ڇڏڻ واري معاملي جي جاچ ڪئي ويندي.....
اسلام آباد (بيورو رپورٽ) عمران خان کي 13 ڏينهن جو الٽيميٽم ڏنو آهي، بهتر آهي ته استعيفيٰ ڏئي هليو وڃي، نواز ليگ اڳواڻ مريم اورنگزيب چيو آهي ته عمران خان استعيفيٰ نه ڏني ته عوام کيس گهرڀيڙو ڪري ڇڏيندو، حڪمران گجرانوالا کان ملتان تائين پي ڊي ايم جا جلسا روڪڻ ۾ ناڪام ٿي ويا، ووٽ چور حڪومت جا ڏينهن ڳڻجي چڪا آهن، پ پ اڳواڻ نيئر بخاري چيو آهي ته ڪيسز ۽ گرفتارين سان عوامي احتجاجن کي نٿو روڪي سگهجي، قومي ناڻو لٽيندڙ حڪمرانن کان حساب وٺڻ جا ڏينهن ويجهو اچي ويا آهن، لاهور وارو جلسو حڪومت جي تابوت ۾ آخري ڪوڪو ثابت ٿيندو.......
اسلام آباد (مانيٽرنگ ڊيسڪ) وفاقي وزير شبلي فراز جي نواز ليگ اڳواڻ اسحاق ڊار تي تنقيد، پنهنجي ٽوئيٽ بيان ۾ شبلي فراز چيو آهي ته برطانوي اينڪر سوال ۽ اسحاق ڊار جي جوابن مان ظاهر ٿيو ته سچ اڳيان سندن هٿ پير ٿڌا ٿي ويندا آهن، اُهي پنهنجي ڦرلٽ بچائڻ لاءِ ملڪ کي بدنام ڪرڻ کان به نٿا مُڙن، ملڪي معيشت کي تباهه ڪندڙ جوابدار انٽرويو ڏيڻ لاءِ صحتمند ۽ قانون اڳيان بيمار ٿي ويندو آهي، وزيراعظم جي خصوصي معاون شهزاد اڪبر چيو آهي ته برطانوي اينڪر کي ڏنل انٽرويو ۾ اسحاق ڊار وائکو ٿي ويو، پاڻ کي ارسطو سمجهندڙ اسحاق ڊار اينڪر جي سوالن جا جواب نه ڏئي سگهيو، اسحاق ڊار خلاف ريفرنس ۾ سندس دبئي وارين ملڪيتن جا تفصيل شامل ڪيا ويا آهن.
ڪراچي (اسٽاف رپورٽر) سنڌ جي مختلف علائقن ۾ ڌار ڌار حادثن جي نتيجي ۾ 4 ڄڻا اجل جو شڪار ٿي ويا. راونتي ڀرسان هلندڙ ٽرئڪٽر ۾ ڪپڙو ڦاسڻ سبب نوجوان لياقت حسين کوسو فوت، سيوهڻ ڀرسان تيز رفتار ٽرڪ پينو فقير کي چيڀاٽي ماري ڇڏيو، واقعي بعد ڊرائيور فرار، پوليس ٽرڪ تحويل ۾ وٺي ڇڏي. ٽنڊو محمد خان ڀرسان جهرڪ پُل تي ٽرڪ جي ٽڪر ۾ پيرسن فقير الهڏنو جهرڪ اجل جو شڪار، پنو عاقل لڳ ڪمند سان ڀريل ٽرڪ ڪلٽي ٿيڻ جي نتيجي ۾نوجوان ظفر چاچڙ ٿڏي تي فوت ٿي ويو.
لاهور (مانيٽرنگ ڊيسڪ) پي ٽي آءِ سرڪار قومي ادارن ۽ اُنهن جي شخصيتن کي تڪراري بڻائي رهي آهي، حڪومت مسئلا حل ڪرڻ بدران ملڪ کي مسئلستان بڻائي ڇڏيو، لاهور پهتل صوبائي وزير ناصر شاهه جي حڪومت مٿان ڇتي تنقيد، ناصر شاهه چيو آهي ته ادارا ملڪي سلامتي جا ضامن هوندا آهن، اسان سڀ ادارن جو احترام ڪريون ٿا، وفاقي سرڪار قومي ادارن کي تڪراري بڻائڻ کان پاسو ڪري، بلاول ڀٽو ڪورونا ۾ مبتلا ٿيڻ بعد احتياط طور آئيسوليٽ ٿي ويو آهي، سندس غير موجودگي ۾ آصفه ڀٽو زرداري پيپلز پارٽي جي نمائندگي ڪندي.
ڪراچي (مانيٽرنگ ڊيسڪ) ملڪ ۾ قاتل وائرس ڪورونا وڌيڪ 75 ماڻهن کان حياتيون کسي ورتيون، 2 هزار 829 نوان ڪيس ظاهر، ٽنڊو محمد خان ۾ ڪورونا جا 12 نوان ڪيس ظاهر، مٽياري ۾ وڌيڪ 11 ڄڻا وائرس جو شڪار، حيدرآباد ۾ شهرين ۽ شادي هالز انتظاميا جي اپيل تي شادي جي انڊور تقريبن تي پابندي 13 ڊسمبر تائين ختم، ڪمشنر حيدرآباد جو چوڻ آهي ته شادي هالز ۽ بينڪوئيٽس ۾ شادي جي تقريبن لاءِ اڳواٽ بُڪنگ ٿيل هئي، جنهن سبب 13 ڊسمبر تائين انڊور تقريبون ڪرڻ جي اجازت ڏني وئي آهي.
دوڙ ( ن پ ا) ڳوٺ نياز حسين ڪورائي واسي اغوا ڄاڻايل شخص معصوم ڌيءُ سميت عورتاڻي آواز تي هرکجي اغوا ٿي ويو. پوليس جو چوڻ آهي ته نوجوان اسحاق حاجاڻو اغوا ناهي ٿيو، هو عورتاڻي آواز تي هرکجي معصوم نينگري سميت گهوٽڪي ويو آهي، پوليس جو چوڻ آهي ته نوجوان جو موبائل فون ٽريس ڪرايو جنهن مان سندس لوڪيشن گهوٽڪي جي ضلعي جي ٻڌائي پئي وڃي. دوڙ ياد رهي ته 4 ڏينهن اڳ نوجوان جي وارثن اغوا جو شڪ ظاهر ڪندي چيو هو ته نوجوان اسحاق ۽ سندس 4 سالن جي معصوم نينگري صنم گهر کان ڄام صاحب ويندي رستي تان گم ٿي ويا.
حيدرآباد (بيورو رپورٽ) ايڪتا عيد جو ڏهاڙو ويجهو ايندي ئي سنڌ جي ٻئي نمبر وڏي شهر حيدرآباد ۾ به ايڪتا تقريبون شروع ٿي ويون آهن جڏهن ته شهر جي اڪثر علائقن ۾ شام ٿيندي ئي رستن تي نوجوان سنڌي ويس وڳا پهري اجرڪ ۽ ٽوپيون پائي ريلين جي صورت ۾ گشت ڪندي نظر اچن ٿا. روزانو ”پنهنجي اخبار“ ۽ ”ٽائيم نيوز“ پاران اعلانيل ”ڪراچي سنڌ آهي ۽ سنڌ جند آهي“ ايڪتا ڏهاڙي جي اعلان تي سماجي تنظيم اسپارڪ پاران قاسم آباد جي روينيو ڪالوني ۾ ايڪتا تقريب منعقد ڪئي وئي. تقريب ۾ اسپارڪ اڳواڻ زاهد حسين ٿيٻو، ايڪٽو وومين فورم جي اڳواڻ نازش فاطمه، قمر سلطانه، فرحت آرائين، شوڪت سريوال ۽ ٻين شرڪت ڪئي جڏهن ته تقريب جون اسٽريٽ چلڊرين پاران قومي گيتن تي ٽيبلوز پيش ڪري جهمريون هنيون ويون. تقريب دوران سنڌ جي نج رسمن کي اجاگر ڪرڻ لاءِ غير رسمي طور شادي جي تقريب منعقد ڪئي وئي جنهن ۾ گهوٽيتا ڄڃ جي صورت ۾ شادي جون رسمون ادا ڪرڻ لاءِ گهوٽ وٺي پهتا ۽ رسمون ادا ڪرڻ بعد ڪنوار کي رخصت ڪري پاڻ سان گڏ وٺي ويا. غير رسمي رسم دوران ڪنوار جي رخصتي وقت تقريب ۾ جذباتي منظر به ڏسڻ ۾ آيا. ايڪتا تقريب کي خطاب ڪندي اسپارڪ اڳواڻ زاهد ٿيٻو، نازش فاطمه ۽ ٻين چيو ته ثقافتي تقريبن سان سنڌ جي هزارين سالا پراڻي ثقافت اجاگر ٿي رهي آهي. تعليمي ادارن ۾ ٿيندڙ ايڪتا پروگرامن سان مستقبل جي معمارن کي ثقافت بابت ڄاڻ فراهم ٿي رهي آهي ان ڪري ڪورونا ايس او پيز کي نظر ۾ رکندي ڊسمبر وارو پورو مهينو هر هنڌ تقريبون منعقد ڪيون وڃن. اڳواڻن اعلان ڪيو ته هو 6 ڊسمبر تي ايڪتا جي عيد ڀرپور نموني ملهائيندا. ٻئي پاسي سنڌ هاري ڪاميٽي طرفان 6 ڊسمبر تي ايڪتا جو ڏهاڙو ڀرپور نموني سان ملهائڻ جو اعلان ڪيو ويو آهي. سنڌ هاري ڪاميٽي جي مرڪزي سينيئر نائب صدر ثمر حيدر جتوئي ڄاڻايو آهي ته هر سال جيان هن سال به سنڌ هاري ڪاميٽي ايڪٽا جو ڏهاڙو قومي عيد جيان ملهائيندي. سنڌ جا ماڻهو ثقافتي ڏهاڙو ملهائي دنيا کي پرامن ۽ قديم ثقافت جي امين هئڻ جو احساس ڏياريندا آهن.
عمرڪوٽ(رپورٽر) ڪراچي سنڌ آهي ۽ سنڌ جند آهي جي سري هيٺ ٽائيم نيوز ۽ پنهنجي اخبار سان گڏ عمرڪوٽ جي نوجوانن طرفان گلشن سليم ۾ مچ ڪچهري ۽ راڳ رنگجي محفل منعقد ڪئي وئي، جتي نوجوانن، شهرين ۽ صحافين سميت ڀرپاسي جي ڳوٺاڻن وڏي انگ ۾ شرڪت ڪئي، جتي لوڪ فنڪارن پاران لوڪ گيت ڳائي مچ ڪچهري ۾ ويٺل نوجوانن توڙي شهرين کي جهومائي ڇڏيو، نوجوانن طرفان سنڌي ٽوپي، اجرڪون ۽ پٽڪا پائي قومي گيتن تي رقص ڪري سنڌ سان محبت جو بهتر نموني سان اظهار ڪيو ۽ 6 ڊسمبر تي ٽائيم نيوز ۽ پنهنجي اخبار سان ايڪتا ڏهاڙو ڀرپور نموني سان ملهائڻ جو اعلان ڪيو آهي، ان موقعي تي مچ ڪچهري منعقد ڪندڙ نوجوانن ۽ شهرين ٽائيم نيوز سان ڳالهائيندي چيو ته 6 ڊسمبر تي ڪراچي سنڌ آهي ۽ سنڌ جند آهي جو ايڪتا ڏهاڙو ملهائي رهيا آهيون، سنڌ جي ٻيٽن تي ميري اک رکڻ وارن کي اسان واضح طور پيغام ڏيڻ ٿا چاهيون ته سنڌ جو انچ انچ سنڌين جو آهي ۽ اسان انهيءَ جي حفاظت ڪنداسين ۽ انهيءَ عنوان هيٺ اسان مچ ڪچهري منعقد ڪئي آهي. هنن چيو ته 6 ڊسمبر تي اسين پنهنجا ثقافتي لباس پائي ريليون ڪڍي اهو پيغام ڏينداسين ته ڪراچي سنڌ آهي ۽ سنڌ جند آهي ۽ 6 ڊسمبر ڀرپور نموني سان ٽائيم نيوز ۽ پنهنجي اخبار سان گڏ ملهائينداسين، هنن وڌيڪ چيو ته سنڌي پنهنجي ڄمڻ کان وٺي مرڻ تائين ثقافت کي ناهن وساريندا، سنڌ جي ٻيٽن ۽ وسيلن تي قبضو ٿي رهيو آهي، انهيءَ وقت ۾ ٽائيم نيوز ۽ پنهنجي اخبار پاران "ڪراچي سنڌ آهي ۽ سنڌ جند آهي" جي سري هيٺ ايڪتا ڏهاڙو ملهائي رهي آهي، انهي ٽائيم نيوز ۽ پنهنجي اخبار جي سموري سٿ کي سلام پيش ڪيون ٿا. هنن پيو ته پنهنجي اخبار ۽ ٽائيم نيوز جي سرواڻ علي قاضي سنڌ جو اهو سپوت پٽ آهي جيڪو پنهنجي سنڌ امڙ لاءِ هر پل سڀني کان اڳڀرو آهي.
گڊو (ن پ ا) گڊو ۾ آبپاشي کاتي جي زمينن تان قبضا ڇڏائڻ لاءِ آپريشن دوران رهواسين ۽ عملدارن ۾ چڪريون، مڇريل ماڻهن جي پٿراءُ ۾ ايس ڊي او ايريگيشن سوڌو 5 ڄڻا زخمي، ڳوٺاڻن جو بئراج جي ڪنارن تي اڏيل گهر ڊاهڻ خلاف مظاهرو، رهواسين چيو آهي ته انتظاميا ورهين کان رهندڙ ماڻهن جا گهر ڊاهي رهي آهي، متبادل جاءِ ڏيڻ بنا گهر ڊاهڻ سبب هو ٻچن سوڌو دربدر ٿي ويندا.
حيدرآباد ( رپورٽر) تُلي داس پمپنگ اسٽيشن جَي پاڻي ۾ ٻيهر پوليو وائرس جِي موجودگي جو انڪشاف ڪيو ويو آهي. صحت کاتي جون ڦڙتيون وڌي ويون، ڊي ايڇ او حيدرآباد محمد جمن باهوٽو چيو آهي ته پوليو وائرس جِي پکيڙ روڪڻ لاءِ ڪوشش ڪئي پئي وڃي، ڊي سي ۽ صحت کاتي جا عملدار حڪمت عملي جوڙي رهيا آهن، انڪاري والدين ۾ سجاڳي پيدا ڪري هر ٻار کي پوليو کان بچاءُ جا ڦڙا پياريا ويندا.
لاهور (مانيٽرنگ ڊيسڪ) پنجاب سرڪار شهباز شريف ۽ حمزه شهباز جي پرول تي آزادي ۾ هڪ ڏينهن جي واڌ ڪري ڇڏي، سُڌ سماءَ بابت صوبائي صلاحڪار فردوس عاشق اعواڻ چيو آهي ته وڏي وزير عثمان بُزدار جي هدايت تي پرول تي آزادي ۾ 24 ڪلاڪن جي واڌ ڪئي وئي آهي، شهباز شريف ۽ حمزه شهباز جي پرول تي آزادي اڄ پوري ٿي رهي آهي، آزادي ۾ واڌ جي منظوري نواز ليگ جي درخواست تي ڏني وئي....
اسلام آباد (مانيٽرنگ ڊيسڪ) اڳوڻي صدر آصف زرداري ۽ عبدالغني مجيد جي پارڪ لين ريفرنس ۾ حاضري کان ڇوٽ واري درخواست منظور، اسلام آباد جي احتساب عدالت ۾ ٻڌڻي دوران حسين لوائي، طحهٰ رضا، اقبال نوري ۽ ٻيا جوابدار پيش، نيب جو شاهد به دستاويزن سان گڏ پيش ٿيو، احتساب عدالت ۾ ٺٽو واٽر سپلاءِ اسڪيم ۾ مبينا ڪرپشن واري ريفرنس تي به ٻڌڻي، نيب پراسيڪيوٽر ۽ شاهد پيش، عدالت اڳوڻي صدر آصف زرداري ۽ ٻين جوابدارن جي حاضري کان ڇوٽ واري درخواست منظور ڪري ورتي.
ڪُنري (ن پ ا) ڪُنري ۽ نبي سر روڊ پوليس ڪورونا سبب گهر ۾ قرنطينه ٿيل ڪولهي اتحاد جي اڳواڻ کي گرفتار ڪري ورتو، ڳوٺ چوئٿرام ڪولهي ۾ چڙهائي دوران ڀارمل ڪولهي گرفتار، ڪولهي اتحاد جي اڳواڻ ۽ پي آءِ ٽي جي ڪارڪن سوڌو 4 جوابدارن خلاف ڪيس داخل، اسسٽنٽ ڪمشنر سان منهن ماري، ڌمڪيون ڏيڻ ۽ ڊيوٽي اٽڪاءُ جا قلم شامل، ڀارمل ڪولهي جو چوڻ آهي ته پوليس مخالفن ۽ بااثرن جي چرچ تي سندن خلاف ڪارروائيون ڪيون آهن، ڪولهي اتحاد طرفان پوليس خلاف احتجاج جو چتاءُ ڏنو
مٺي (ن پ ا) مٺي ۾ ڊي سي جي مبينا ڌمڪين ۽ بداخلاقي خلاف سول اسپتال سوڌو سمورين تعلقه اسپتالن ۾ او پي ڊي جو بائيڪاٽ، ڊاڪٽرز ۽ پئراميڊيڪل اسٽاف ڊي سي خلاف سراپا احتجاج بڻيل، مٺي، ڏيپلو، اسلام ڪوٽ، ننگرپارڪر، ڏيپلو، ڇاڇرو ۽ ٻين تعلقن ۾ اسپتالن جي تالابندي، علاج ۽ دوا لاءِ پهتل مريضن کي واپس موٽايو ويو، سول اسپتال مٺي آڏو قائم احتجاجي ڪئمپ ۾ ڊاڪٽرز، نرسز ۽ ملازم ويٺل، ملازمن چيو آهي ته ڌمڪيون ڏيندڙ ۽ بداخلاقي ڪندڙ ڊي سي خلاف نوٽيس ورتو وڃي، سندس خلاف ڪارروائي تائين احتجاج جاري رکيو ويندو، مٺي ۾ ڊي سي ٿرپارڪر محمد نواز سوهو جا حامي به رستن تي نڪري آيا، ڪشمر چوڪ تي مظاهري دوران ڊي سي جي حمايت ۾ نعرا هنيا ويا،
قاضي احمد )ن پ ا) قاضي احمد ڀرسان اڌڙوٽ عورت مڙس هٿان ڪُهي قتل، ڳوٺ عبدالحڪريم راهو ۾ جوابدار نذر محمد گهلو پنهنجي زال مسمات حاجاڻي کي قتل ڪري ڇڏيو، پوليس جوابدار کي گرفتار ڪري ورتو، واقعي واري هنڌ تان ڇُرو به هٿ، عورت جو لاش اسپتال ۾ پوسٽ مارٽم بعد وارثن حوالي، پوليس کي قتل جا ڪارڻ معلوم نه ٿي سگهيا.
ڪراچي (نمائندن وٽان) سنڌ جي مختلف شهرن ۾ احساس پروگرام تحت رقم وٺڻ لاءِ مستحق دربدر بڻيل آهن. سينٽرز تي ناقص انتظامن سبب ڪورونا ايس او پيز نظرانداز، تنگواڻي ۾ عورتون ڪيترن ئي ڪلاڪن تائين انتظار ڪرڻ بعد واپس موٽي ويون، باڊهه ۾ انٽرنيٽ نه هئڻ جو بهانو ڪري احساس سينٽر شهر کان ٻاهر قائم ڪيو ويو. عورتن طرفان انتظاميا تي وظيفي جي رقم مان ڪٽوتي ڪرڻ جو الزام لڳايا. ڀريا سٽي ۾ ايجنٽ سرگرم ٿي ويا، مستحق عورتن جي رقمن مان ڪٽوتي تي ايجنٽس ۽ شهرين ۾ جهيڙي واري وڊيو سوشل ميڊيا تي وائرل ٿي وئي. ڪنڊيارو ۾ چوٿين ڏينهن به احساس ڪفالت سينٽر نه کُليا، سوين مستحق عورتون سيءُ ۾ ڪلاڪن جا ڪلاڪ انتظار ڪرڻ تي مجبور آهن. قاضي احمد ۾ احساس پروگرام جي رقمن ۾ ڪٽوتي خلاف متاثرن جون دانهون، امدادي رقم جي ڪمپيوٽرائيزڊ رسيد نه ملڻ جو انڪشاف به ڪيو ويو. احساس سينٽر ٻاهران رش دوران ڪيتريون ئي مستحق عورتون بيحال ٿي ويون. گهوٽڪي ۾ احساس ڪفالت سينٽرز تي عورتن جي رش، انتظاميا ايس او پيز تي عمل ڪرائڻ ۾ ناڪام ٿي وئي.
دادو )ن پ ا) دادو جي عدالت ۾ وائيلڊ لائيف کاتي جي ٽيم طرفان هرڻي جي شڪار واري ڪيس جو چالان پيش ڪيو ويو. ڊسٽرڪٽ اينڊ سيشن ۾ پيش ڪيل چالان ۾ 2 نالا غائب هجڻ جو انڪشاف ڪيو ويو. چالان ۾ 13 مان 11 جوابدار ڄاڻايا ويا، عدالت ٻيلي کاتي جي ٽيم کان پڇاڻو ڪيو ته چالان مان 2 نالا گُم ڪرڻ جا ڪهڙا سبب آهن؟ عدالت وائيلڊ لائيف کاتي کي سڀاڻي نئون چالان پيش ڪرڻ جو حڪم ڏئي ڇڏيو، پير آف راڻيپور جي پُٽ صالح شاهه ۽ ضامن علي شاهه سوڌو 9 جوابدارن جي 30-30 هزار رُپين جي مچلڪن عيوض ضمانت منظور ڪئي وئي.
لاڙڪاڻو /راڌڻ ( رپورٽر) لاڙڪاڻي جي رحمت پور ٿاڻي جي حد نظر محلي ۾ ٻن اڻڄاتل ھٿياربندن دڪاندار زوهيب شيخ کان ڦر جي ڪوشش ڪئي. دڪاندار جي مزاحمت تي ھٿياربند ڦورن گولي ھڻي کيس زخمي ڪري ڇڏيو. دڪاندار کي زخمي حالت ۾ چانڊڪا اسپتال منتقل ڪيو ويو. ٻئي طرف راڌڻ ويجهو ڳوٺ بخش لاکير واسي کان وزير سيال کان اڻڄاتل هٿياربندن موٽر سائيڪل ڦر ڪرڻ جي ڪوشش ڪئي. ڦر دوران مزاحمت ڪرڻ تي هٿياربندن موٽرسائيڪل سوار کي گوليون هڻي فرار ٿي ويا. اطلاع تي ڳوٺاڻا ۽ پوليس وڏي تعداد ۾ هٿياربندن جي پويان پئجي ويا جنهن بعد هڪ هٿياربند کي پوليس گرفتار ڪري ورتو. زخمي نوجوان ميهڙ اسپتال منتقل ڪيو ويو.
ڪراچي (اسٽاف رپورٽر) اسٽيل ملز جي زمين سنڌ سرڪار جي ملڪيت آهي، زمين ڪنهن ٻئي استعمال ۾ آندي وئي ته صوبائي حڪومت کي واپس ڪرڻي پوندي، پ پ سينيٽر رضا رباني اسٽيل ملز جي هزارين ملازمن جي برطرفي آءِ ايم ايف سان معاهدي جو نتيجو قرار ڏيندي چيو آهي ته حڪومت سرمائيدارن کي فائدو ڏيڻ لاءِ ملازمن کي بيروزگار ڪري رهي آهي، اسٽيل ملز جي مستقبل بابت ڪابه رٿابندي ڪرڻ بنا ملازمن کي فارغ ڪيو ويو، پيپلز پارٽي اسٽيل ملز جي ملازمن سان گڏ آهي، ڪراچي ۾ پريس ڪانفرنس دوران رضا رباني چيو ته وفاق ٻيٽن سوڌو صوبن جي وسيلن تي قبضو ڪرڻ گهري ٿو، قومي ادارن جي نجڪاري وارا فيصلا به غيرآئيني آهن.
ڪراچي (انٽرٽينمينٽ ڊيسڪ) پاڪستاني فلم اسٽار ماهرا خان هلندڙ سال جي آخري مهيني جي شروعات ۾ هڪ پيغام شيئر ڪيو آهي. ماهرا پنهنجي ننڍپڻ جي هڪ تصوير شيئر ڪندي پنهنجي سالگرهه جي مهيني جي حوالي سان هڪ پيغام شيئر ڪيو جنهن جي ڪمينٽ سيڪشن مان پتو پوي ٿو ته اداڪار اکي پنهنجي سالگرهه جو وڏو انتظار آهي. هن پنهنجي پيغام ۾ لکيو ته ڊيئر ڊسمبر اوهان کي خبر آهي ته اوهان منهنجا پسنديده آهيو ان لاءِ نااميد نه ڪجو.
ممبئي (انٽرٽينمينٽ ڊيسڪ) سيف علي خان جي ڌيءُ سارا علي خان جڏهن ڪرينا کي آنٽي چيو ته سندس پيءُ سيف علي خان حيراني جوڳو رد عمل ڏنو. ڀارتي ميڊيا رپورٽس موجب سيف علي خان ۽ امرتا سنگهه جي ڌيءُ سارا علي خان لاءِ اهو وقت ڏکيو هو ته هو ڪرينا کي ڇا چئي سڏي. هڪ شو دوران جڏهن ان بابت سارا علي خان کان پڇيو ويو ته هن چيو ته ڪرينا ڪپور خان پاڻ ان ڳالهه تي چيو هو ته تنهن جي ماءُ موجود آهي ته مان ۽ تون ٻئي دوستن جيان آهيون. سارا چيو ته پيءُ به ٻي ماءُ بابت ڪڏهن ڪجهه ناهي چيو. شو جي ميزبان ڪرن جوهر چيو ته ڪرينا کي ننڍي ماءُ به چئي سگهجي ٿو جنهن تي سارا چيو ته ڪرينا کي اها ڳالهه نه وڻي ها. سارا چيو ته مان پاڻ ڳڻتي ۾ هيس ته ڪرينا کي آنٽي چونديس يا ٻيو ڪجهه. سيف علي خان وچ ۾ ڳالهايو ته مون کي خبر آهي ته تون ڪرينا کي آنٽي نه چوندي. اداڪارا ٻڌايو ته ڪرينا کي مان ڪرينا يا رڳو ڪي چئي سڏيندي آهيان.
ڪراچي (انٽرٽينمينٽ ڊيسڪ) هلندڙ سال مارچ ۾ شوبز کي الوداع ڪري مذهبي تعليمات موجب زندگي جو اعلان ڪندڙ فيروز خان ۽ سندس زال وچ ۾ عليحدگي جون خبرون وائرل ٿي رهيون آهن. سوشل ميڊيا تي وائرل ٿيندڙ ٻنهي جي عليحدگي جي خبرن ۾ دعويٰ ڪئي وئي آهي ته ٻنهي ۾ ذاتي رنجش سبب ڪجهه وقت اڳ کان ئي عليحدگي ٿي هئي. ڪجهه سوشل ميڊيا صارفين ٻنهي وچ ۾ طلاق ٿيڻ جون خبرون به پکيڙي رهيا آهن. سوشل ميڊيا تي پکڙيل اهڙين خبرن ۾ ڪجهه سوشل ميڊيا پيجز فيروز خان کي به پنهنجن ٽوئٽس ۽ پوسٽس ۾ مينشن ڪيو آهي جڏهن ته ان باوجود هنن ڪو جواب ناهي ڏنو. سوشل ميڊيا تي وائرل ٿيل اڻ تصديق ٿيل پوسٽس ۾ دعويٰ ڪئي وئي آهي ته ٻنهي شادي جي ٻن سالن کانپوءِ عليحدگي اختيار ڪري ورتي آهي. اهڙين خبرن ۾ ڪنهن به تصديق ٿيل ذريعن جو حوالو ناهي ڏنو ويو ۽ ٻنهي پاران تصويرون شيئر ڪرڻ جي دعويٰ ڪئي وئي آهي ته ٻنهي ۾ عليحدگي کانپوءِ طلاق ٿي وئي آهي. فيروز خان ۽ سندس زال وچ ۾ عليحدگي جون خبرون هڪ اهڙي وقت ۾ سوشل ميڊيا تي وائرل ٿيون آهن جڏهن ته هڪ هفتو اڳ ئي مشهور اداڪارا عروا حسين ۽ ڳائڻي فرحان سعيد جي عليحدگي جون خبرون به وائرل ٿيون هيون.
ڪڍڻ (ن پ ا) ڳوٺ جمع سبيرو ۾ ٽن مهينن جِي ابهم ٻارڙِي صابرين ڌيءُ صدام سبيرو مبينا طور زهر وگهي فوت ٿي وئي. وارثن موقف اختيار ڪيو آهي ته ٻارڙِي جِي ماءُ جو ذهني توازن ٺيڪ ناهي، اُن ئي کيس غلطي سان زهريلي دوا پيئارَي ڇڏِي، ٻارڙِي کي صحت مرڪز پهچايو ويو پر بچي نه سگهِي.
رپڙي ( ن پ ا) رپڙي ويجهو ڪارنهن تڪرار تان ٻن ڌرين ۾ جهيڙي دوران فائرنگ ۾ نوجوان حاڪم ڪلهوڙو مارجي ويو، 3 ڄڻا زخمي ٿي پيا. واقعي بعد ڌرين وچ ۾ ڇڪتاڻ تيز ٿي وئي. مقتول جو لاش ۽ زخمي اسپتال منتقل ڪيا ويا. پوليس جوابدارن جِي گرفتاري لاءِ اثرائتي ڪارروائي ڪرڻ بدران روايتي ڪاررواين ۾ رڌل رهي.
فورم
Irshad Katpar آمريڪي صدارتي چونڊونسٺو ڪالم معلومات سان ڀريل 
Nasir Hussain Maka برساتي ٻوڏ ڄاڻي عوام ڄاڻيفيض کوسو صاحب تمام بهترين لکيو آهي... 
Rana Ashraf نوشهري فيروز ۾ ادارن جي ڪري مينهن عذاب بڻجي ويازبردست 
Qazi Rabail ٻوڏ متاثر ڪنهن در واجهائين ؟سنڌ ۾ برسات تباهي مچائي ڇڏي، انتظاميا مڪمل طور ناڪام...! سنڌ جي مخلتف شهرن ۽ ڳوٺن ۾ لڳاتار سانوڻي جي...Irshad Katpar جمهوريت، جذبا ۽ گورننساهم انگن اکرن تي مشتمل بهترين مضمون. سروي
هاڻ رڳو صحافي نه پر توهان به پنهنجي علائقي جا مسئلا اجاگر ڪري سگهو ٿا، جنهن لاءِ خبرون، تصويرون ۽ فوٽيجز هن نمبر 03022610318 تي واٽس ايپ ڪريو.
اڄ جي تصوير
مضمون
