آءِ ايم ايف جو  اهم شرط به پورو ٿي ويو، ڪامورا پنهنجا اثاثا ٻڌائيندا، نوٽيفڪيشن جاري

اسلام آباد(بيورو رپورٽ) وفاقي حڪومت عالمي مالياتي اداري (آءِ ايم ايف) جي هڪ ٻي وڏي شرط پوري ڪري ڇڏي آهي، فيڊرل بورڊ آف ريونيو (ايف بي آر) گريڊ 17 ۽ ان کان مٿي آفيسرن کي پنهنجا اثاثا ظاهر ڪرڻ جو نوٽيفڪيشن جاري ڪري ڇڏيو آهي. ايف بي آر، انڪم ٽيڪس آرڊيننس 2001 جي شق 237 جي ذيلي شق (1) هيٺ حاصل اختيارن کي استعمال ڪندي، شيئرنگ آف ڊيڪليئيشن آف ايسٽس آف سول سرونٽس رولز 2023 ۾ اهم ترميمون متعارف ڪرائي ڇڏي آهي. ڄاڻايل ترميم ان کان اڳ ۾ 7 آڪٽوبر 2025 تي جاري ڪيل نوٽيفڪيشن 1912(I)/2025 تحت شايع ڪئي وئي هئي، جنھن کي قانون موجب عوامي راءِ کان پوءِ حتمي شڪل ڏني وئي. ايف بي آر جي نوٽيفڪيشن موجب نئين قاعدن ۾ ڪيتريون ئي تبديليون ڪيون ويون آهن، جن مان سڀ کان اهم ترميم هي آهي ته جتي به لفظ سول استعمال ٿيو آهي، اتي پبلڪ جو لفظ شامل ڪيو ويو آهي، ۽ قاعدي 1 جي ذيلي شق (1) ۾ به اها ترميم منظور ڪئي وئي آهي. ايف بي آر رول 2 ۾ هڪ نئين شق (ii-a) شامل ڪئي آهي، جنهن جي مطابق پبلڪ سرونٽ انهن آفيسرن کي چيو ويندو جيڪي وفاقي يا صوبائي حڪومتن، خودمختيار ادارن، سرڪاري ڪارپوريشنز يا حڪومت جي ملڪيتي ڪمپنين جا اهڙا آفيسر هوندا جنهن جو گريڊ  17 يا ان کان مٿي آهي۔ اهي ملازم به شامل هوندا جيڪي سول سرونٽس ايڪٽ 1973 تحت اچن ٿا. هن شق ۾ اهي فرد شامل ناهن، جن کي قومي احتساب آرڊيننس 1999 جي شق 5 جي ڪلاز (n) جي ذيلي شق (iv) تحت استثنا حاصل آهي. ايف بي آر موجب انهن ترميمن جو مقصد قاعدن کي وڌيڪ جامع، واضح ۽ هم آهنگ بڻائڻ آهي، ته جيئن سرڪاري ۽ نيم سرڪاري آفيسرن جي اثاثن جي معلومات جي ڏي وٺ جو نظام وڌيڪ موثر ۽ شفاف ٿي سگهي.