| آرٽيفيشل انٽيليجنس ذريعي سنڌي ٻوليءَ جو پهريون گيت تيار |
حيدرآباد (بيورو رپورٽ) آءِ ٽي جي دنيا ۾ انقلاب آڻيندڙ اي آءِ ٽيڪنالاجي جتي ٻين شعبن کي متاثر ڪرڻ واري آهي اتي فلم انڊسٽري ۽ موسيقي جو شعبو پڻ متاثر ٿيڻ وارو آهي، جنهن جي نتيجي ۾ حقيقي پروفيشنل فنڪارن کي گهر ويهڻو پئجي ويندو ۽ انهن جي جاءِ نان پروفيشنل ۽ غير حقيقي ڪردار والارڻ وارا آهن. اي آءِ ٽيڪنالاجيءَ جي ذريعي سنڌي موسيقيءَ جي شعبي ۾ به اهم اڳڀرائي ٿي وئي آهي ۽ اي آءِ ذريعي سنڌي ٻوليءَ جو پهريون گيت پڻ تيار ٿي ويو آهي. اي آءِ وارو اهو پهريون سنڌي گيت مراد علي شاهہ بڪيرائي تيار ڪيو آهي جيڪو بنيادي طور تي ڪارٽونسٽ آهي ۽ موسيقي جي شعبي سان ان جو اڳ ڪو واسطو نه رهيو آهي. مراد علي شاهہ بڪيرائي هن کان اڳ اي آءِ جي ذريعي انگلش ۽ اردو ٻوليءَ ۾ پڻ گيت تيار ڪري چڪو آهي پر سنڌي ٻوليءَ ۾ اي آءِ ذريعي تيار ڪيل هي پهريون گيت آهي جيڪو سنڌي موسيقي جي دنيا ۾ هڪ اهم اڳڀرائي وارو قدم آهي. اي آءِ سان گيتن جي تياري ۾ ڪنهن حقيقي ڳائڻي، سازندن، ماڊلز يا بهترين لوڪيشنز توڙي ڪيمرائن جي ڪا گهرج ئي نه آهي، بس رڳو اي آءِ ٽيڪنالاجي واري ڪجهه صلاحيت رکندڙ ڪو هڪ ماڻهو ئي رڳو ڪجهه جملن سان پورو گيت تيار ڪري سگهي ٿو. ان سلسلي ۾ مراد علي شاهہ بڪيرائي جو چوڻ آهي ته اي آءِ سان خاص طور تي سنڌي ۾ گيت تيار ڪرڻ ڪنهن قدر ڏکيو هو ڇو ته اي آءِ جا ٽُولز سنڌي ٻولي کي بهتر طريقي سان اڃان سپورٽ نه پيا ڪن پر ان هوندي به ڪجهه محنت جي نتيجي ۾ اها اهم ڪاميابي ماڻي ورتي آهي. مراد علي شاهہ بڪيرا ئي جو چوڻ آهي ته هن وقت سنڌي ۾ گيتن جي تياري ڪجهه ڏکي ضرور آهي پر ٿوري ئي وقت ۾ اي آءِ جا وڌيڪ جديد ٽولز ضرور اچي ويندا جنهن سان ڪو به عام ماڻهو اي آءِ جي ذريعي سنڌي ۾ به گيت تيار ڪري سگهندو.