آمريڪا سعودي ايٽمي پروگرام اسرائيل کي تسلي مڪرڻ سنا مشروط ڪري ڇڏيو

تهران/واشنگٽن (م ڊ) ايران ۽ آمريڪا جي جنگ جاري آهي. ان سلسلي ۾ ايران جي خوزستان جي گورنر جي سيڪيورٽي اسسٽنٽ ولي الله حياتي چيو ته گذريل رات آمريڪي حملي دوران اهواز شهر جي ٻاهرئين حصي ۾ گودام جتي روڊ جي تعمير لاءِ استعمال ٿيندڙ اسفالٽ کي ذخيرو ڪيو ويو هو کي نشانو بڻايو ويو. ايران جي انقلابي گارڊز خميس ڏينهن اعلان ڪيو ته انهن اردن ۾ آمريڪي فوجي سامان تي حملو ڪيو ۽ تباهه ڪيو. آمريڪي ٿاڊ ميزائل دفاعي نظام سان لاڳاپيل هڪ ريڊار، هڪ پيٽريٽ سسٽم، هڪ سي-ريم ريڊار ۽ هڪ هيلي ڪاپٽر هينگر شامل هئا. هرمز ۾ ٽن تيل ٽينڪرن مان هڪ ۾ ڌماڪي کانپوءِ باهه لڳي وئي ٻيا ٻه ٽينڪر پوئتي هٽي ويا. آمريڪي فوج چيو ته هن ايران تي مسلسل 12 هين رات حملي ڪيا آهن، جن ۾ بحري اثاثن، ميزائل ۽ ڊرون اسٽوريج سهولتن، ساحلي نگراني مرڪزن ۽ هوائي دفاعي اثاثن کي نشانو بڻايو ويو.سينٽ ڪام جو چوڻ آهي ته 50,000 کان وڌيڪ آمريڪي فوجي اهلڪار وچ اوڀر ۾ مقرر آهن ۽ هر وقت پنهنجي فرضن کي انجام ڏيڻ لاءِ تيار ۽ تيار آهن. ڪويت جي فوج سوشل ميڊيا ويب سائيٽ ايڪس تي رپورٽ ڪئي ته ملڪ جي هوائي دفاعي نظام ايران پاران لانچ ڪيل ڊرون کي روڪي ڇڏيو آهي. سعودي عرب جي سرڪاري نيوز ايجنسي (ايس پي اي) ملڪ جي ٽرانسپورٽ اٿارٽي جي هڪ سرڪاري ذريعن جو حوالو ڏيندي ٻڌايو ته هڪ حملي جي ڪري آئل ٽينڪر اينسيليا جي ڪمان ۾ باهه لڳي وئي.
 

واشنگٽن (م ڊ) آمريڪي صدر ڊونلڊ ٽرمپ سعودي عرب سان ٿيندڙ سول جوهري معاهدي کي ابراهيمي معاهدي ۾ سعودي عرب جي شموليت سان مشروط ڪري ڇڏيو. ٽروٿ سوشل تي جاري ڪيل بيان ۾ ٽرمپ چيو ته آمريڪي توانائي کاتي ۽ سعودي عرب وچ ۾ طئي ٿيل سول جوهري معاهدي تحت ڪنهن به قسم جي يورينيم رچائڻ جي اجازت نه هوندي. هن چيو ته اهو پروگرام رڳو پرامن ۽ غير فوجي مقصدن لاءِ هوندو، جيئن ايران، گڏيل عرب امارتن ۽ ٻين ملڪن جا سول جوهري پروگرام آهن. ٽرمپ واضح ڪيو ته معاهدي جي منظوري ضرور ڏني ويندي، پر ان جي بنيادي شرط اها هوندي ته سعودي عرب عزت ۽ احترام سان ابراهيمي معاهدي ۾ شامل ٿئي. ٻئي پاسي آمريڪي اخبارن موجب، معاهدي جي مدي 30 سال هجڻ ۽ ان جي ماليت ڪيترن ئي ارب ڊالرن تائين پهچڻ جو امڪان آهي، جڏهن ته ان لاءِ اڃا آمريڪي ڪانگريس جي منظوري گهربل آهي. هوڏانهن اسرائيلي اپوزيشن ان معاهدي تي سخت ڳڻتي ظاهر ڪئي آهي. اڳوڻي اسرائيلي بچاءَ واري وزير اويگڊور ليبرمين چيو آهي ته هر فوجي جوهري پروگرام جي شروعات سول جوهري پروگرام سان ٿيندي آهي، تنهن ڪري سعودي عرب کي اهڙي سهولت ڏيڻ خطي ۾ جوهري هٿيارن جي ڊوڙ جو سبب بڻجي سگهي ٿي. آمريڪي صدر ڊونلڊ ٽرمپ خبردار ڪيو آهي ته جيڪڏهن يمن جا حوثي جهازن تي حملو جاري رکندا ته آمريڪا ايران کي ذميوار قرار ڏيندو ۽ تهران خلاف سخت فوجي ڪارروائي ڪري سگهجي ٿي.