اسلام آباد جي ڪرپٽ اهلڪارن پاران وڌيڪ 2 ڪروڙ ڀتو اوڳاڙي جو انڪشاف

اسلام آباد(م ڊ) اين سي سي آءِ جي 13 آفيسرن خلاف ڪرپشن اسڪينڊل ۾ حيران ڪندڙ انڪشاف سامهون آيا آهن، جن کي ڪال سينٽرن کان هر مهيني لکين رپيا وصول ڪرڻ ۽ غيرقانوني ڪاروبار جي مدد ڪرڻ جي الزام ۾ گرفتار ڪيو ويو آهي. ايف آءِ اي ذريعن موجب راولپنڊي ۾ هر مهيني 15 غير قانوني ڪال سينٽرن مان 15 ملين رپيا گڏ ڪيا ويندا هئا. ايڊيشنل ڊائريڪٽر شهزاد حيدر جي ٽيم کي هي رقم حسن امير ذريعي ملندي هئي. سيپٽمبر 2024 کان اپريل 2025 تائين 120 ملين رپيا گڏ ڪيا ويا. سب انسپيڪٽر بلال نئين ڪال سينٽر لاءِ هر مهيني 800,000 رپيا مقرر ڪيا هئا. هي ڊيل اسلام آباد جي سيڪٽر ايف-11 ۾ ڪال سينٽر تي ڇاپو هڻي ڪئي وئي. ايس ايچ او ميان عرفان 40 ملين رپين ۾ ڊيل کي فائنل ڪيو. مئي 2025 ۾ عامر نذير کي راولپنڊي آفيس جي ڪمان ڏني وئي. نديم خان کي ڊپٽي ڊائريڪٽر ۽ صارم علي کي سب انسپيڪٽر مقرر ڪيو ويو. ان کان پوءِ ڊپٽي ڊائريڪٽر سلمان علوي به هن ٽيم جو حصو بڻيو ۽ هن ٽيم پڻ 15 ملين رپيا ورتا. ذريعن ٻڌايو ته سب انسپيڪٽر صارم پنهنجي هڪ سيڪريٽري محي الدين کي اڳيان رکيو، راولپنڊي ۾ هڪ ڪال سينٽر تي ڇاپو هنيو ۽ 14 چيني شهري گرفتار ڪيا. صارم پنهنجي فرنٽ مين ذريعي چيني شهري ڪيلون جي زال سان رابطو ڪيو جنهن جو نالو اريبا رباب آهي ۽ اها پاڪستاني آهي.  جنهن مڙس جي بازيابي لاءِ 8 ملين رپيا فراهم ڪيا، باقي 13 چيني شهري جي آزادي لاءِ 12 ملين رپيا ورتا ويا، صارم اريبا جي مڙس تي تشدد ڪيو ۽ هڪ وڊيو ٺاهي اريبا ڏانهن موڪلي، جنهن کان پوءِ قانوني گهرجون پوريون ڪرڻ لاءِ 10 لک رپيا وڌيڪ وصول ڪيا ويا. ذريعن موجب، هن ڇاپي جي 21 ملين رپين جي رقم ورهائي وئي، صارم علي کي 1.7 ملين رپيا، عثمان بشارت کي 1.4 ملين رپيا، ظهير عباس کي 10 لک رپيا، ڊپٽي ڊائريڪٽر نديم کي عثمان بشارت جي آفيس مان 9.5 ملين رپيا، ايڊيشنل ڊائريڪٽر عامر نذير 7 ملين رپيا ڏنا ۽ نديم پاڻ 2.7 ملين رپيا رکيا. ايف آءِ اي ذريعن وڌيڪ چيو ته جوابدارن کي گرفتار ڪرڻ لاءِ ٽيمون جوڙيون ويون آهن.