اسلام آباد هاءِ ڪورٽ جي 4 ججز پاران 27هين ترميم جي مخالفت، سپريم ڪورٽ ۾ چئلينج،  درخواست تي اعتراض

اسلام آباد(بيورو رپورٽ/م ڊ) اسلام آباد هاءِ ڪورٽ جي 4 ججن 27هين ترميم خلاف سپريم ڪورٽ ۾ چئلينج ڪري ڇڏي، سندن درخواست تي اعتراض لاڳو ڪيو ويو، سپريم ڪورٽ ۾ اسلام آباد هاءِ ڪورٽ جي 4 ججن 27هين ترميم چئلينج ڪئي هئي. ذريعن موجب سپريم ڪورٽ برانچ درخواست تي اعتراض لاڳو ڪري ڇڏيو ۽ درخواست وصول ڪرڻ کان انڪار ڪندي چيو آهي ته اهو سپريم ڪورٽ جي اختيارن جو دائرو نه آئيني معاملو آهي. واضح رهي ته اسلام آباد هاءِ ڪورٽ جو جسٽس محسن اختر ڪياني، جسٽس بابر ستار، جسٽس ثمن رفعت امتياز ۽ جسٽس سردار اسحاق چيلينج ڪندڙن ۾ شامل آهن، هوڏانهن قانون واري وفاقي وزير اعظم نذير تارڙ چيو آهي ته پارليامينٽ جي ترميم کي ڪنهن به عدالت سامهون چئلينج نٿي ڪري سگهجي، جاري ڪيل بيان ۾ هن چيو ته آئيني عدالت جو قيام ڪا نئين شيءِ ناهي، پارليامينٽ بالادست آهي ۽ ان کي بالادست هجڻ گهرجي، وزير قانون جو وڌيڪ چوڻ هو ته سياست ۾ جيڪڏهن انتشار  ۽ انتهاپسندي ايندي ته پوءِ نه ملڪ اڳتي وڌندو نه ئي وري نظام، پوءِ سياستدانن جو بسترو گول ڪيو وڃي ٿو، پوءِ وري ڳالهيون ٿين ٿيون، آئين ۾ ترميم ڪرڻ جو طريقيڪار به داخل ڪيو ويو آهي. پارليمينٽ آئين ۾ ترميم ڪري سگهي ٿي، پارليامينٽ جي ڪيل ترميم کي ڪنهن عدالت سامهون چئلينج نه ڪيو ويندو، آئين ۾ لکيو ويو آهي ته ملڪ کي چونڊيل نمائندن کي هلائڻو آهي،  اها ئي ڳالهه سپريم ڪورٽ پنهنجي فيصلي ۾ لکي. فيصلي ۾ چيو ويو ته 17 غير چونڊيل جج پارليامينٽ کان وڌيڪ ذهين ۽ بااختيار نٿا ٿي سگهن، انهن کي ٿيڻ به نه گهرجي، وفاقي وزير جو وڌيڪ چوڻ هو ته پاڪستان آئيني طريقي سان هلي رهيو آهي، آئيني عدالت جو قيام ڪا نئين شيءِ ناهي، موجوده آئيني ترميم ۾ اهڙي عدالت ٺاهي وئي آهي جنهن ۾ چئني صوبن جي برابر نمائندگي هوندي.