اسلام آباد هاءِ ڪورٽ ۽ اڊيالا جيل ٻاهران ڌرڻي جو اعلان، پارليامينٽ هلڻ نه ڏينداسين، حالات خراب ٿي سگهن ٿا: سهيل آفريدي

اسلام آباد(بيورو رپورٽ/م ڊ) ڪي پي جي وڏي وزير سهيل آفريدي پاران اڊيالا جيل ٻاهران لڳايل ڌرڻو  ختم ٿي ويو، جنهن کانپوءِ وڏو وزير اسلام آباد هاءِ ڪورٽ پهچي ويو، چيف جسٽس ڪي پي جي وڏي وزير سهيل آفريدي سان ملڻ کان انڪار ڪري ڇڏيو، ميڊيا سان ڳالهائيندي سهيل آفريدي چيو ته چيف جسٽس اسلام آباد هاءِ ڪورٽ جو پيغام مليو ته اوهان سان نٿو ملي سگهان، اسان جي ٻڌڻي نه ٿي، فيصلو ڪيو آهي ته قومي اسيمبلي ۽ سينيٽ جو اجلاس هلڻ نه ڏينداسين، اڱاري تي هاءِ ڪورٽ ۽ اڊيالا جيل جي ٻاهران گڏ ٿينداسين، اڄ چيف جسٽس اسلام آباد هاءِ ڪورٽ ملاقات نه ڪئي، وڏي وزير  سهيل آفريدي جو وڌيڪ چوڻ هو ته سمورا آئيني ۽ قانوني دڳ ورتا آهن، ٻيو ڪهڙو دڳ بچيو آهي جنهن وسيلي ليڊر سان ملي سگهون، عدالت انصاف نه ڪري سگهي ته عوام پاڻ انصاف ڪندو، پوءِ عوام قانون به هٿ ۾ کڻندو ۽ حالتون خراب ٿيون ته ڪنٽرول نه ٿي سگهنديون، اسان گهڻو صبر ڪيو برداشت ڪيو پر ڪير  سمجهي نه سگهيو، هاڻي اسان تي ڪا ميار نه هوندي.، هوڏانهن امن امان جي صورتحال سبب اڊيالا جيل  ٻاهران سڪيورٽي هاءِ الرٽ ڪئي وئي،   5 اضافي چوڪيون ٺهي ويون، 12 ايس ايڇ اوز تي ٻڌل وڏي نفري مقرر ڪئي  وئي،  ، 12 -12 ڪلاڪ جون 2 شفٽون هونديون، نفري ۾ عورت پوليس اهلڪار پڻ شامل آهن، سڪيورٽي اهلڪار اينٽي رائٽ سامان سان ليس هوندا، ٽريفڪ پوليس جا 10 آفيسر به مقرر  ۽ لفٽر به موجود رهندا، سڪيورٽي جي سڌي ريت نگراني ايس پي صدر انعم شير ڪندي، مجموعي طور 23 انسپيڪٽر ۽ 7 سئو کان وڌيڪ سپاهي ۽ آفيسر ڊيوٽي تي مقرر هوندا