| اسلام آباد ۾ وڻڻ جي واڍي خلاف حڪومتي اتحادي ۽ اپوزيشن هڪ ٿي ويا: حڪومت تي سخت تنقيد |
اسلام آباد(بيورو رپورٽ) اسلام آباد ۾ وڻن جي واڍي وارو معاملو قومي اسيمبلي تائين پهچي ويو. حڪومت ۽ اپوزيشن جي ميمبرن گهرو معاملن واري مملڪتي وزير طلال چوڌري کي سخت تنقيد جو نشانو بڻايو. اپوزيشن ميمبر رياض فتيانه چيو ته اسلام آباد کي ماحولياتي آلودگي جي لحاظ کان لاهور بڻايو پيو وڃي، ميمبرن وڻن جي ڪٽائي وارو معاملو اسٽيڊنگ ڪميٽي ۾ زير بحث آڻڻ جو به مطالبو ڪيو. مملڪتي وزير طلال چوڌري دعوا ڪئي ته 29 هزار وڻ وڍيا ويا آهن، 40 هزار وڻ لڳايا ويا آهن ۽ ايندڙ وڻڪاري مهم ۾ 60 هزار وڌيڪ وڻ لڳايا ويندا. ڪجهه ماڻهن جي ڪاوڙ ڪنهن ٻي ڳالهه تي آهي ۽ اهي اسلام آباد ۾ وڻن جي واڍي جي آڙ ۾ حڪومت خلاف مهم هلائي رهيا آهن. قومي اسيمبلي اجلاس ۾ اپوزيشن ميمبر رياض فتيانه طرفان اسلام آباد ۾ وڻن جي واڍي بابت پيش ڪيل ڌيان طلب نوٽيس جي جواب ۾ گهرو معاملن بابت مملڪتي وزير طلال چوڌري چيو ته هڪ سينيئر صحافي ملتان ۾ وڻن جي واڍي جي وڊيو اسلام آباد جي وڊيو ظاهر ڪري شيئر ڪئي، جنهن سبب معاملو وڌيڪ خراب ٿيو. ڪجهه ماڻهو ڪنهن ٻي سبب ڪري حڪومت کان ناراض آهن، تنهنڪري وڻن جي واڍي جي آڙ ۾ حڪومت تي پنهنجي ڪاوڙ ڪڍي رهيا آهن. هن دعوا ڪندي چيو ته هي معاملو ميڊيا ۽ سوشل ميڊيا تي سوچي سمجهي منصوبي تحت اُٿاريو پيو وڃي. طلال چوڌري وڌيڪ چيو ته اسلام آباد ۾ پولن جو سبب بڻجندڙ جهنگلي شهتوت جا وڻ ڪاٽيا ويا آهن، ان کانسواءِ ٻيا وڻ نه ڪاٽيا ويا آهن. ڪُل 29 هزار 515 وڻ وڍيا ويا آهن، جن جي جاءِ تي 40 هزار نوان وڻ لڳايا ويا آهن، جڏهن ته ايندڙ وڻڪاري مهم ۾ 60 هزار وڌيڪ وڻ لڳائڻ جي تياري ڪئي پئي وڃي. هن چيو ته هو ان معاملي تي ميڊيا ۽ پارليامينٽ جي ميمبرن کي مڪمل جوابدهي ڏيڻ لاءِ تيار آهي ۽ اسٽيڊنگ ڪميٽي آڏو به انگ اکرن سان گڏ پيش ڪيا ويندا. ان موقعي تي اپوزيشن ميمبر ۽ ڌيان طلب نوٽيس پيش ڪندڙ رياض فتيانه سوال اٿاريو ته ڇا ماحولياتي اٿارٽي کي باءِ پاس ڪري اهي وڻ ناهن وڍيا ويا، ۽ ڇا ماحولياتي اٿارٽي کان اجازت نامو ورتو ويو هو، هن سوال جو مملڪتي وزير طلال چوڌري واضح جواب نه ڏئي سگهيو. پاڪستان پيپلز پارٽي جي قومي اسيمبلي ميمبر شازيه مري به اسلام آباد ۾ وڻن جي واڍي تي خدشا ظاهر ڪندي چيو ته اهڙي نموني وڻن جو واڍي انتهائي افسوسناڪ آهي. اپوزيشن ميمبر علي محمد خان به حڪومت کي وڻن جي واڍي تي سخت تنقيد ڪندي چيو ته ڪو اهو به ٻڌائي ته هن موسم ۾ ڪهڙا وڻ لڳايا ويندا آهن، ۽ ڇا جيڪي وڻ لڳايا ويا آهن اُهي هن سرد موسم ۾ وڌي سگهندا، وڻ وڌيڪ لڳايا وڃن، پر وڻڪاري مهم ۾ انگ وڌايو وڃي. ڊپٽي اسپيڪر سيد غلام مصطفي شاهه اسلام آباد ۾ وڻن جي واڍي وارو معاملو قومي اسيمبلي جي ماحوليات بابت اسٽيڊنگ ڪميٽيءَ حوالي ڪندي هدايت ڪئي ته ان معاملي کي سنجيدگي سان ورتو وڃي ۽ هر صورت ۾ ماحول جو خيال رکيو وڃي.