اسلام آباد ۾ 3 ٽائون ڪارپوريشن، 3 ميئر 6 ڊپٽي ميئر چونڊبا: مقامي حڪومت آرڊيننس جاري

اسلام آباد(بيورو رپورٽ) صدر آصف علي زرداري اسلام آباد مقامي حڪومت آرڊيننس جاري ڪري ڇڏيو۔ اسلام آباد ۾ قومي اسيمبلي جي ٽن تڪن جي حدن مطابق 3 ٽائون ڪارپوريشن هونديون۔ هر ٽائون ڪارپوريشن ۾ هڪ ميئر ۽ ٻه ڊپٽي ميئر هوندا۔ آرڊيننس مطابق ميٽروپوليٽن ڪارپوريشن جي جاءِ تي ٽائون ڪارپوريشن يا ٽائون ڪارپوريشنز هونديون۔ سربراهه مان مراد ٽائون ڪارپوريشن جو ميئر يا يونين ڪائونسل جو چيئرمين هوندو۔ مقامي حڪومت مان مراد يونين ڪائونسل ۽ ٽائون ڪارپوريشن هوندي، جنهن ۾ حڪومت طرفان مقرر ڪيل ايڊمنسٽريٽر پڻ شامل هوندو۔حڪومت عوامي اعتراضن ۽ سفارشن کان پوءِ ٽائون ڪارپوريشن ۽ يونين ڪائونسلن جي حدن ۾ ترميم ڪري سگهي ٿي پر چونڊ شيڊيول جي اعلان کان پوءِ ترميم نه ڪئي ويندي۔ حڪومت، گهرو وزارت جي سفارش تي ٽائون ڪارپوريشن اندر يونين ڪائونسلن جي تعداد ۾ اضافو يا گهٽتائي ڪري سگهي ٿي۔ يونين ڪائونسلن جي تڪبندي اليڪشن ڪميشن ڪندو۔ هر ٽائون ڪارپوريشن ۾ يونين ڪائونسلن جا چيئرمين جنرل ميمبر طور شامل هوندا۔ هر ٽائون ڪارپوريشن ۾ چار عورتون، هڪ هاري يا ورڪر، هڪ واپاري يا ڪاروباري شخص، هڪ نوجوان ميمبر ۽ هڪ غير مسلم ميمبر شامل هوندو۔ يونين ڪائونسل جي جنرل ميمبرن جو چونڊ ڳجهي راءِ شماري ذريعي ٿيندي۔ جنرل ميمبرن جي چونڊ لاءِ پوري يونين ڪائونسل کي ملٽي ميمبر وارڊ ۾ تبديل ڪيو ويندو. هر ووٽر هڪ جنرل ميمبر اميدوار کي ووٽ ڏيندو۔ سڀ کان وڌيڪ ووٽ حاصل ڪندڙ نو اميدوار جنرل ميمبر چونڊيا ويندا۔ ڪامياب اميدوار 30 ڏينهن اندر ڪنهن به سياسي جماعت ۾ شموليت اختيار ڪري سگهن ٿا۔ يونين ڪائونسل جا جنرل ميمبر مخصوص سيٽن تي ميمبرن کي هٿ مٿي ڪري چونڊيندا۔ جنرل ميمبر ۽ مخصوص سيٽن جا ميمبر پاڻ مان ئي هٿ مٿي ڪري چيئرمين ۽ وائس چيئرمين چونڊيندا۔ چيئرمين ۽ وائس چيئرمين به 30 ڏينهن اندر ڪنهن سياسي جماعت ۾ شامل ٿي سگهن ٿا۔ آرڊيننس مطابق يونين ڪائونسل جو چيئرمين ٽائون ڪارپوريشن جو جنرل ميمبر هوندو۔ جنرل ميمبر ٽائون ڪارپوريشن لاءِ مخصوص سيٽن جي ميمبرن جي چونڊ هٿ مٿي ڪري ڪندا۔ ٽائون ڪارپوريشن جا ميمبر اڪثريتي ووٽ سان هٿ مٿي ڪري گڏيل طور ميئر ۽ ڊپٽي ميئر چونڊيندا۔ ٽائون ڪارپوريشن جو ميمبر ئي ميئر يا ڊپٽي ميئر جي چونڊ وڙهي سگهندو۔ جتي مقامي حڪومت فعال نه هوندي، اتي حڪومت ايڊمنسٽريٽر مقرر ڪندي۔ مقامي حڪومت يا ايڊمنسٽريٽر ٽيڪس، فيس، ڪرايو، ٽول ۽ چارج لاڳو ڪري سگهندو۔ هر ٽيڪس تجويز جي پهرين حڪومت کان منظوري ضروري هوندي۔ ايڊمنسٽريٽر جي ٽيڪس تجويز حڪومت جي منظوريءَ کان پوءِ قومي اسيمبلي ۾ منظوري لاءِ پيش ڪئي ويندي۔ مقامي حڪومت يا ايڊمنسٽريٽر ٽيڪس ۾ اضافي، گهٽتائي، خاتمو يا ڇوٽ ڏئي سگهندو۔ حڪومت مقامي حڪومت يا ايڊمنسٽريٽر کي هدايتون جاري ڪندي، ۽ انهن هدايتن تي عمل ڪرڻ مقامي حڪومت يا ايڊمنسٽريٽر لاءِ لازمي هوندو.