اماراتي صدر جو پاڪستان جو پهريون سرڪاري دورو، لاڳاپا مضبوط بڻائڻ ۽ سهڪار تي اتفاق

اسلام آباد(بيورو رپورٽ) متحده عرب امارات جي صدر شيخ محمد بن زايد النهيان پاڪستان جي پهرين سرڪاري دوري تي راولپنڊي پهچي ويو. جئين ئي متحده عرب امارات جي صدر جو جهاز پاڪستان جي فضائي حدن ۾ داخل ٿيو ته جي ايف 17 ٿنڊر جهازن فضائي سلامي پيش ڪئي۔ پي اي ايف نور خان ايئر بيس راولپنڊي تي پهچڻ تي مهمان کي 21 توپن جي سلامي ڏني وئي. وزيراعظم محمد شهباز شريف، نائب وزيراعظم ۽ پرڏيهي وزير اسحاق ڊار، چيف آف آرمي اسٽاف ۽ چيف آف ڊفينس فورسز فيلڊ مارشل سيد عاصم منير ۽ وفاقي وزيرن معزز مهمان جو استقبال ڪيو. ان موقعي تي متحده عرب امارات ۽ پاڪستان جا قومي ترانا وڄايا ويا. پاڪستان جي هٿياربند فوجي دستن طرفان مهمان کي گارڊ آف آنر پيش ڪيو ويو. دوري دوران متحده عرب امارات جو صدر وزيراعظم پاڪستان سان ملاقات ڪئي، جنهن ۾ ٻطرفي لاڳاپن سان گڏ عالمي ۽ علائقائي معاملن تي خيالن جي ڏي وٺ ڪئي وئي. متحده عرب امارات جي صدر جي نور خان ايئر بيس آمد کي پاڪستان ٽيليويزن سڌي نشريي ۾ ڏيکاري رهيو آهي. ٻئي طرف وزير اعظم شهباز شريف جي دعوت تي پهتل يو اي اي جي صدر وچ ۾ ڀائراڻن تعلقن کي وڌيڪ مضبوط ڪرڻ تي اتفاق ڪيو ويو. اقتصادي تعاون، سيڙپڪاري، توانائي ۽ انفراسٽرڪچر ۾ شراڪتداري وڌائڻ تي زور ڏنو ويو. آءِ ٽي، جديد ٽيڪنالاجي ۽ عوامي رابطا کي فروغ ڏيڻ، ٻه طرفي واپار ۾ اضافي جي وسيع امڪان تي اتفاق ڪيو ويو. علائقائي ۽ عالمي معاملن تي ويجهڙائي سان مشاورت جاري رکڻ جي عزم جو اظهار ڪيو ويو. ٻنهي ملڪن ۾ امن، استحڪام ۽ پائيدار ترقي لاءِ گڏيل ڪوششن تي اتفاق ڪيو ويو. پاڪستان يو اي اي دورو اسٽريٽجڪ شراڪتداريءَ کي وڌيڪ مضبوط بڻائيندو، وزيراعظم جو چوڻ هو ته يو اي اي صدر جي دوري سان تمام گهڻو خوش آهيون. مختصر دوري کانپوءِ يو اي اي صدر واپس روانو ٿي ويو.