انڊر 19 ورلڊ ڪپ ۾ پاڪ ڀارت ميچ نه ٿيندا، ڌار ڌار گروپن ۾ شامل

دبئي (اسپورٽس نيوز) آءِ سي سي انڊر 19 مردن جي ڪرڪيٽ ورلڊ ڪپ 2026ع جي ميچن جو شيڊول جاري ڪيو ويو. ايونٽ جي ميزباني زمبابوي ۽ نميبيا 15 جنوري کان 6 فيبروري تائين ڪندا، جنهن ۾ 16 ٽيمون حصو وٺنديون ۽ 41 ميچون کيڏيون وينديون. ايونٽ جي افتتاحي ميچ هندستان ۽ آمريڪا جي وچ ۾ کيڏي ويندي. گروپ اي ۾ هندستان، بنگلاديش، آمريڪا ۽ نيوزي لينڊ شامل آهن، جڏهن ته گروپ بي ۾ زمبابوي، پاڪستان، انگلينڊ ۽ اسڪاٽلينڊ آهن. گروپ سي ۾ آسٽريليا، آئرلينڊ، جاپان ۽ سريلنڪا، گروپ ڊي ۾ تنزانيا، ويسٽ انڊيز، افغانستان ۽ ڏکڻ آفريڪا شامل آهن. ايونٽ ۾ پاڪستان ۽ ڀارت جي ٽيمن کي الڳ الڳ گروپن ۾ رکيو ويو آهي.