انڌا اونڌا ويڄ: چين ۾ ڊاڪٽر زڪام جي مريضه کي ڪوما ۾ اماڻي ڇڏيو

بيجنگ (انٽريسٽنگ نيوز) شادي کان اڳ وڏي ڏينهن جي تياري ڪرڻ هر ڇوڪري جو خواب هوندو آهي، پر هڪ عورت لاءِ اهو خواب ڊيڄاريندڙ خواب ۾ تبديل ٿي ويو. اوڀر چين جي هڪ ڪنوار عام زڪام جو علاج ڪرائڻ کان پوءِ ڪوما ۾ هلي وئي. شانڊونگ صوبي جي 24 سالن جي وانگ رنرين جي شادي 25 اپريل تي ٿيڻي هئي. وانگ رنرين کي زڪام ٿيو جنهن جي علاج هن جي زندگي هميشه لاءِ بدلائي ڇڏي. جنوري ۾، وانگ کي ڳلي ۾ سور ٿيو ۽ هن سوچيو ته اهو عام زڪام آهي، تنهن ڪري هن ويجهي ڪلينڪ جو دورو ڪيو. اتي ٻه ڊاڪٽر هئا ۽ مختصر ڳالهه ٻولهه کان پوءِ انهن مان هڪ دوا لکي ۽ ان کي انجيڪشن لڳائي. وانگ جي مڱيندي زينگ چيو ته ڊاڪٽرن ڪڏهن به اهو نه پڇيو ته ڇا وانگ کي ڪنهن به دوا کان الرجي آهي ۽ انهن چمڙي جي ٽيسٽ به نه ڪئي. انجيڪشن کان ڪجهه منٽن بعد وانگ جي حالت خراب ٿي وئي ڳالهائڻ بند ٿي ويو الٽيون اچڻ لڳيون ۽ ساهه کڻڻ ۾ به ڏکيائي ٿي. جڏهن هن جي حالت خراب ٿي وئي، زينگ هڪ ايمبولينس کي فون ڪيو ۽ جڏهن طبي ٽيم پهتي وانگ جي حالت خراب ٿي چڪي هئي. اسپتال جي ڊاڪٽرن شروعات ۾ چيو ته وانگ کي هاءِ بلڊ پريشر ۽ ساهه کڻڻ ۾ تڪليف ٿي هئي، جيڪو ممڪن طور تي الرجي جو رد عمل هو. علاج جي باوجود، سندس دماغ 4 منٽن تائين آڪسيجن کان محروم رهيو، جنهن جي ڪري ناقابل تلافي نقصان ٿيو. زينگ ڪلينڪ خلاف شڪايت داخل ڪئي ۽ هڪ جاچ ۾ ظاهر ٿيو ته انجڪشن ڏيندڙ عورت ڊاڪٽر نه هئي. 3 مهينن تائين ڪوما ۾ رهڻ کان پوءِ وانگ پنهنجي شادي کان 2 ڏينهن اڳ هوش ۾ آئي. وانگ جيڪا 92 ڏينهن تائين ڪوما ۾ هئي 23 اپريل تي پنهنجون اکيون کوليون ۽ زينگ ڏانهن مسڪرائي ڏٺو پر ان وقت ڳالهائڻ کان قاصر هئي. ڪيس اڃا تائين جاچ هيٺ آهي، تنهن ڪري نقصان ۽ قانوني فيصلي جو اڃا تائين اعلان نه ڪيو ويو آهي.