اورنگي ٽائون شپ جي زمين ۾ مبينا جعلسازي: دڪان ڪمرشل لِيز ڪرائڻ جو اسڪينڊل ظاهر

ڪراچي (اسٽاف رپورٽر) ڪي ايم سي اورنگي ٽائون شپ جي قيمتي سرڪاري زمين تي  ٽائون پروجيڪٽ جي ڪجھه عملدارن ۽ لينڊ مافيا جي مبينه گٺ جوڙ سان قبضا مافيا ٻيهر سرگرم ٿي وئي آهي، جنهن بابت نوان انڪشاف سامهون آيا آهن. ذريعن موجب اورنگي پروجيڪٽ سيڪٽر ڏھ ۾ سرڪاري زمين تي 27 دڪانن کي جعلسازي ذريعي ڪمرشل لِيز ڪرائڻ جو وڏو اسڪينڊل ظاهر ٿيو آهي، ذريعن مطابق لينڊ مافيا اورنگي پروجيڪٽ سيڪٽر 10 ۾ ويلفير سينٽر لاءِ مختص فلاحي پلاٽ تي قبضو ڪرڻ جي ڪوشش ڪري رهي آهي. رپورٽس مطابق ايس ٽي 6 نالي فلاحي پلاٽ جي رڪارڊ ۾ هيراڦيري ڪري ان تي غيرقانوني طور 27 دڪان تعمير ڪيا ويا ۽ جعلي نقشا ۽ ڪاغذن جي بنياد تي انهن دڪانن جون لِيزون جاري ڪيون ويون. ٻئي طرف سيڪٽر 10 ۾ موجود فلاحي پلاٽ ايس ٽي 13 تي به جعلي ڪمرشل لِيزون جاري ڪرائڻ لاءِ مافيا طرفان ڪي ايم سي عملدارن تي شديد دٻاءُ وڌو پيو وڃي. ذريعن جو چوڻ آهي ته اوريجنل لي آئوٽ پلان مطابق ٻئي پلاٽ صرف فلاحي ۽ عوامي مفادن لاءِ مختص آهن ۽ ڪنهن به قسم جي ڪمرشل سرگرمي هتي غيرقانوني آهي. سنڌ هاءِ ڪورٽ پڻ پنهنجي حڪم ۾ واضح ڪيو آهي ته ڪو به فلاحي پلاٽ ڪمرشل مقصدن لاءِ استعمال نٿو ڪري سگهجي. ان ئي پسمنظر ۾ ڪي ايم سي جي لاڳاپيل عملدارن جعلي لِيزون رد ڪرائڻ لاءِ قدم کڻندي سنڌ هاءِ ڪورٽ ۾ رسمي طور درخواست داخل ڪري ڇڏي آهي، جڏهن ته ضروري رڪارڊ ۽ ثبوت پڻ عدالت ۾ جمع ڪرايا ويا آهن.