اياز جي شاعري دنيا تائين نه پهچائڻ اسان جي زيادتي آهي: سردار شاهه

حيدرآباد (بيورو رپورٽ)  حيدرآباد آرٽ ڪائونسل پاران 20 ھين صديء جي مھان ڪوي شيخ اياز جي 28 ھين ورسيء جي حوالي سان ڪالھ سنڌي ٻولي بااختيار اداري جي ھال ۾ ،،شيخ اياز ۽ سنڌ،، جي موضوع تي ليڪچر پروگرام ڪرايو ويو. جنھن جي صدارت سنڌ جي تعليم واري کاتي جي وزير سيد سردار علي شاھ ڪئي. ان موقعي تي صوبائي وزير تعليم سنڌ سردار علي شاهه خطاب ڪندي چيو ته شيخ اياز تمام وڏو پاڙھو ھو، جنھن سڄي دنيا جي ادب ۽ شاعري کي پڙھيو ۽ پرکيو. تخليقڪار جي تخليق ۾ سماجي حالتون، درد ۽ خوابن سان گڏ اتساھ به ملندو آهي. ھن چيو ته اسان شيخ اياز جي شاعريءَ کي دنيا تائين نہ پھچائي اياز سان تمام وڏي زيادتي ڪئي آھي. اسان صرف اياز جي قبر تي چادر چاڙهي گل نڇاور ڪري ساڳيون ڳالهيون ڪيون ٿا. اسان جو اصل ڪم شيخ اياز جي شاعريء کي دنيا جي ٻولين ۾ ترجمو ڪري دنيا تائين پھچايون، نه ته شيخ اياز صرف اسان تائين عظيم رھندو. ھن چيو ته دنيا ھاڻ تبديل ٿي چڪي آهي، ھي ڊجيٽل دور آھي، ان ۾ اسان کي ڪيئن شيخ اياز کي نوجوان نسل تائين پهچائڻو آھي، ان تي ڪم ڪرڻ جي ضرورت آھي، ان لاء ٻولي جي انجنيئرنگ جو ادارو قائم ڪرڻ جي ضرورت آھي.نامياري دانشور جامي چانڊيو ته شيخ اياز جديد سنڌ جو عظيم شاعر آھي. اياز ھڪ تمام وڏو موضوع آھي، ھن چيو ته شاعر صرف فرد نه پر دور ھوندا آھن. شيخ اياز رڳو ھڪ فرد نه پر جديد سنڌ جو ھڪ وڏو ادبي دور آھي. ھن چيو ته اياز سان اسان جو عشق آھي. شيخ اياز عالمگير سطح جو شاعر ھو. حيدرآباد آرٽ ڪائونسل جي صدر ۽ سنڌي ٻولي بااختيار اداري جي چيئرمين ڊاڪٽر اسحاق سميجو چيو ته شيخ اياز جديد سنڌ اڏيندڙ شاعر آھي. جنھن تي گھڻ طرفي تحقيق ڪرڻ جي ضرورت آھي. ھن چيو ته شيخ اياز سنڌ جي سڃاڻپ آھي. پروگرام کي فياض نصير مرزا، فياض لطيف ۽ ٻين پڻ خطاب ڪندي شيخ اياز جي ادب ۽ شاعري تي ڳالھايو.