| ايران ۾ حالتون ڏکيون آهن، حڪومت تشدد نه ڪري: سني عالم |
زاهدان (م ڊ) ايران جي سني عالم مولوي عبدالحميد اسماعيلزئي چيو ته ايراني عوام جي زندگي ۽ معاشي حالتون انتهائي مشڪل ٿي ويون آهن. عوام کي پرامن احتجاج جو حق آهي ۽ حڪومت کي مظاهرين خلاف تشدد جو رستو نه اختيار ڪرڻ گهرجي. هن وڌندڙ ڇڪتاڻ ڏانهن اشارو ڪندي چيو ته اسان سڀ ايراني آهيون. اڄ، ماڻهو بکيا آهن ۽ ڪجهه سرمائيدار پڻ سخت مشڪلاتن کي منهن ڏئي رهيا آهن. اختيارين کي ماڻهن کي ٻڌڻ گهرجي ۽ انهن جي مطالبن تي غور ڪرڻ گهرجي. جمعي جي خطبي ۾ هن چيو ته ڪوپن سسٽم جهڙيون اسڪيمون يا منصوبا اثرائتا نه آهن. اختيارين کي ڏسڻ گهرجي ته ماڻهو ڇا چاهين ٿا، ماڻهن جو طريقو ۽ خواهش معيار آهي، ڪنهن کي به ماڻهن تي پنهنجي راءِ مسلط نه ڪرڻ گهرجي.
عوام لاءِ ڪوپن سسٽم لاڳو، کاڌو ۽ ٻارڻ سستو فراهم
تهران: ايران جو ‘ڪوپن سسٽم’ هڪ پراڻو نظام آهي جيڪو وقت بوقت معاشي دٻاءُ ۽ پابندين دوران لاڳو ڪيو ويو جيڪو هاڻ ٻيهر لاڳو ڪيو ويو آهي. هن نظام تحت، گهٽ آمدني وارن شهرين کي ضروري شيون جهڙوڪ کاڌو (تيل، کنڊ، گوشت، چانور) ۽ ٻارڻ سبسڊي جي شرحن تي فراهم ڪيون وينديون آهن.
احتجاج ڪرنسي جي قيمت ۾ گهٽتائي تان شروع ٿيو، 6 ڄڻا قتل ٿي چڪا
تهران: ايران ۾ ڪرنسي جي قدر ۾ وڏي گهٽتائي ۽ وڌندڙ مهانگائي خلاف عوامي احتجاجن جو سلسلو لڳ ڀڳ پنج ڏينهن اڳ شروع ٿيو هو ۽ اڃا تائين جاري آهي. گذريل پنجن ڏينهن ۾ مظاهرين ۽ ايراني سيڪيورٽي فورسز جي وچ ۾ جهڙپن جي نتيجي ۾، هاڻي تائين ڇهه مظاهرين ۽ هڪ پوليس آفيسر جي مارجي وڃڻ جي خبر آهي.
ايراني ميڊيا تي ملڪ اندر ٿيندڙ احتجاج جو بليڪ آئوٽ، خبرون نظرانداز
تهران: ايران جي رياستي نشرياتي اداري ملڪ ۾ جاري احتجاج کي مڪمل طور نظرانداز ڪري ڇڏيو آهي. ايران جي سرڪاري ٽيليويزن ۽ رڊيو گذريل ڏينهن واري احتجاجي مظاهرن جو ذڪر صبح واري بليٽنز ۾ نه ڪيو.