| اينٽي ڪرپشن جا ڇاپا ڇو ؟ خانگي اسڪولن پاران هڙتال سڏ |
ڪراچي (اسٽاف رپورٽر) گرينڊ الائنس آف پرائيويٽ اسڪولز ايسوسيئيشن سنڌ جي اڳواڻن علي حيدر اينٽي ڪرپشن کاتي پاران خانگي اسڪولن تي ڇاپن ۽ وڊيوز ٺاهڻ خلاف صوبي جي سمورن خانگي اسڪولن ۽ ڪاليجن ۾ 8 جنوري تي ڪاري ڏينهن ۽ 9 جنوري تي هڙتال جو اعلان ڪري ڇڏيو ، ڪالهه هتي پريس ڪانفرنس کي خطاب ڪندي اڳواڻن اينٽي ڪرپشن خلاف عدالت ۾ نئين درخواست پڻ داخل ڪرڻ جو فيصلو ڪيو، هنن چيو ته عدالت جو حڪم رڳو ڊيٽا جي تصديق تائين محدود هو، اينٽي ڪرپشن کي اسڪولن ۾ وڃڻ، ڇاپا هڻڻ يا اسڪول انتظاميه، والدين ۽ ٻارن کان سوال ڪرڻ جو ڪو به اختيار ناهي. اسڪولن ۾ هٿياربند ٽيمن جي داخلا ڪنهن به حالت ۾ قبول نه ڪئي ويندي.گرينڊ الائنس مطالبو ڪيو ته ڊيٽا جي تصديق جو عمل صرف ڊائريڪٽوريٽ آف پرائيويٽ انسٽيٽيوشنز جي آفيس تائين محدود ڪيو وڃي، اينٽي ڪرپشن جي مداخلت بند ڪئي وڃي. هنن الزام هنيو ته ٿرپارڪر ۾ اينٽي ڪرپشن جا آفيسر في اسڪول کان 15 هزار رپيا رشوت طلب ڪري رهيا آهن.
| مفت تعليم چڪاسڻ لاءِ خانگي اسڪول وڃون ٿا: اينٽي ڪرپشن |
ڪراچي: سنڌ جي اينٽي ڪرپشن کاتي جي ترجمان واضح ڪيو آهي ته خانگي اسڪولن جا دورا عدالتي حڪمن تحت ڪيا پيا وڃن، ترجمان موجب سنڌ هاءِ ڪورٽ سکر بينچ سنڌ چلڊرن رائيٽ ٽو فري ايڊميشن ايڪٽ 2013ع تحت خانگي اسڪولن ۾ 10سيڪڙو شاگردن کي مفت تعليم جي فراهمي لاءِ حڪم جاري ڪيا هئا ترجمان موجب عدالتي حڪم تحت اينٽي ڪرپشن اختيارين پاران ڪميٽي قائم ڪئي وئي آهي جيڪا پرائيويٽ اسڪولز ايجوڪيشن جي اختيارين سان گڏجي خانگي اسڪولن جو رڪارڊ چڪاسيندي آهي، ڇاپن يا رشوت جا الزام غلط آهن.