اين آءِ سي وي ڊي ۾ ڪرپشن جي جاچ ڪرائي وڃي: ٽرانسپيرنسي انٽرنيشنل

ڪراچي (رپورٽ: الطاف چنو) ٽرانسپيرنسي انٽرنيشنل پاڪستان نيشنل انسٽيٽيوٽ آف ڪارڊيالوجي اينڊ وي اسڪولر ڊزيز (اين آءِ سي وي ڊي) ۾ ڪرپشن ۽ مالي بي ضابطگين تي سخت سوال اٿاري ڇڏيا آهن. اداري طرفان سنڌ جي وڏي وزير کي خط لکي خدشن جو اظهار ڪندي اين آءِ سي وي ڊي ۾ ٿيندڙ مالي ۽ انتظامي بدعنوانين جي مڪمل جاچ جو مطالبو ڪيو ويو آهي. ٽرانسپيرنسي انٽرنيشنل پاڪستان موجب ڊائريڪٽر جنرل آڊٽ سنڌ جي سال 2024-25 جي رپورٽ ۾ اين آءِ سي وي ڊي ۾ 46 سنگين مالي ۽ انتظامي بي ضابطگين جي نشاندهي ڪئي وئي آهي. خط ۾ چيو ويو آهي ته طبي سامان ۽ دوائن جي خريداري ۾ بدانتظامي، غير شفاف معاهدا ۽ ضابطن جي ڀڃڪڙي سبب قومي خزاني کي وڏو نقصان پهتو آهي. اداري موجب وڌيڪ ادائيگيون ۽ غير منصفانه ترقين سبب قومي خزاني کي 4.8 ارب رپين کان وڌيڪ جو نقصان ٿيو، جڏهن ته غير مجاز ڀرتين، وڏين پگهارن ۽ ضابطن جي ابتڙ مقررين جا به ثبوت مليا آهن. آڊٽ رپورٽ ۾ اهو پڻ سامهون آيو آهي ته نان پريڪٽسنگ الاؤنس جي نالي تي ڊاڪٽرن کي ڪروڙين رپين جون وڌيڪ ادائيگيون ڪيون ويون.خط ۾ ٻڌايو ويو آهي ته دوائن ۽ طبي سامان جي خريداري ۾ 569 ملين رپين جي بي ضابطگين جي نشاندهي ڪئي وئي آهي، جڏهن ته غير مجاز خرچن ۽ اضافي ادائيگين سان قومي خزاني کي 40 ملين رپين کان وڌيڪ جو نقصان پهتو آهي. ان کان علاوه ٽيڪس ۾ ڪٽوتي نه ڪرڻ ۽ سرڪاري فنڊن جي غلط استعمال جا ثبوت به آڊٽ رپورٽ جو حصو آهن ٽرانسپيرنسي انٽرنيشنل پاڪستان سنڌ حڪومت کان مطالبو ڪيو آهي ته اين آءِ سي وي ڊي ۾ ٿيندڙ سمورين بي ضابطگين جي شفاف ۽ مڪمل جاچ ڪرائي وڃي ۽ ذميوارن خلاف سخت ڪارروائي عمل ۾ آندي وڃي، ته جيئن عوام جو اعتماد بحال ٿي سگهي ۽ قومي وسيلن جو تحفظ يقيني بڻائي سگهجي.