اين ايف سي مان ڪٽوتي سان مالي مسئلا حل نه ٿيندا، ٽيڪس وصولي اختيار صوبن حوالي ڪيا وڃن: بلاول

اسلام آباد(بيورو رپورٽ) پ پ چيئرمين بلاول ڀٽو زرداري چيو آهي ته جڏهن وفاقي حڪومت شروعات ۾ سنڌ کي سروسز تي سيلز ٽيڪس گڏ ڪرڻ جي ذميواري ڏني، ته اها رقم 16.6 ارب رپيا هئي، جنهن کي سنڌ حڪومت هڪ سال اندر وڌائي 28 ارب رپيا ڪري ڇڏيو. اڄ سنڌ 307 ارب رپيا سيلز ٽيڪس گڏ ڪري رهيو آهي. هن زور ڏنو ته اين ايف سي تحت صوبن جي حصي ۾ ڪٽوتي سان مالي مسئلا حل نه ٿيندا، تنهن ڪري ٽيڪس وصولي جا اختيار صوبن ڏانهن منتقل ڪرڻ جي ضرورت آهي. سنڌ حڪومت جي اطلاعات کاتي جي انتظامن هيٺ ايوان صدر ۾ پ پ چيئرمين بلاول ڀٽو زرداري ڪارڪردگي رپورٽ پيش ڪندي ٻڌايو ته رڪارڊ تي موجود آهي ته سيلز ٽيڪس وصولي ۾ سنڌ جي ڪارڪردگي سڀ کان بهتر رهي آهي. ٻين صوبن به هن حوالي سان وفاق کان بهتر ڪارڪردگي ڏيکاري آهي، جنهن مان ثابت ٿئي ٿو ته ٽيڪس وصولي ۾ صوبا وڌيڪ موثر آهن. هن وڌيڪ چيو ته صوبن کي اها ترغيب ڏني وڃي ته هو مقرر هدف کان وڌيڪ گڏ ٿيندڙ ٽيڪس آمدني پاڻ وٽ رکي سگهن. هن چيو ته  سنڌ حڪومت صحت جي شعبي تي خاص توجهه ڏئي رهي آهي ۽ سڄي سنڌ ۾ صحت جي نظام کي مضبوط ڪرڻ لاءِ اهم قدم کنيا ويا آهن. سنڌ ۾ عالمي معيار جون صحت جون سهولتون مفت مهيا ڪيون پيون وڃن. جناح اسپتال کي عالمي معيار مطابق ٺاهيو ويو، جڏهن ته اين آءِ سي وي ڊي ۾ دل جي بيمارين جو علاج مڪمل طور مفت فراهم ڪيو پيو وڃي. بلاول ڀٽو زرداري وڌيڪ چيو ته سنڌ ۾ اين آءِ سي وي ڊي وانگر 11 اسپتال قائم ڪيا آهن. ڪينسر جو مهانگو علاج مفت ڪيو پيو وڃي ۽ سنڌ ۾ پهريون ڀيرو ڪينسر جي علاج لاءِ سائبر نائف ٽيڪنالاجي متعارف ڪرائي وئي آهي. ان کان علاوه هن چيو ته سنڌ ۾ يونيورسٽين جي تعداد ٻيڻي ڪئي وئي، صوبي ۾ غربت گهٽائڻ لاءِ پروگرام شروع ڪيو ويو ۽ ٻه لک سولر سسٽم پڻ ورهايا ويا.  اِن موقعي تي ملڪن جي سفيرن ۽ سفارتي عملي، پاڪستان جي ڪاروباري برادري جي نمائندن ۽ اسلام آباد جي اليڪٽرانڪ ۽ پرنٽ ميڊيا جي نامور صحافين شرڪت ڪئي. چيئرمين بلاول ڀٽو زرداري شرڪت ڪندڙن کي سنڌ جي تبديلي جي ڪهاڻي بابت آگاهه ڪيو ۽ صحت، تعليم، موسمياتي تبديلي ۽ پاڻي، امن و امان، سماجي تحفظ، معيشت، توانائي ۽ آمد و رفت سميت مختلف شعبن ۾ حاصل ڪيل ڪاميابين متعلق تفصيلي بريفنگ ڏني.