| اِي چالان به حادثا روڪي نه سگهيا:خوني ڊمپر ۽ ٽرالر 2 حياتيون کسي ورتيون: 9 زخمي |
ملير/ڪراچي(نمائندن وٽان) اِي چالان به هيوي ٽريفڪ حادثن کي روڪي نه سگهيا، 2خوني ڊمپرن 2 انساني حياتيون کسي ورتيون، 9 زخمي، ان ڏس ۾ ملير جي علائقي رزاق آباد ۾ قومي شاهراهه تي تيز رفتار ڊمپر رڪشا ۽ مسافر وين سان ٽڪرائجي ويو، جنهن جي نتيجي ۾ رزاق آباد واسي رڪشا ڊرائيور 42 ورهين جي رحيم بخش پٽ عبدالرشيد کوسو ٿڏي تي دم ڏنو، جڏهن ته ڪراچي کان خيرپور ويندڙ وين ۾ سوار چئن عورتن سميت 9 مسافر زخمي ٿي پيا جن مان چئن جي حالت ڳڻتي جوڳي ٻڌائي پئي وڃي، زخمين ۾ نگهت، شاهده، عليزه، مهناز، علي گل، شوڪت، شاھ مير، عادل حسين ۽ رب نواز شامل آھن، پوليس ڊمپر مالڪ ۽ ڊرائيور کي گرفتار ڪري ورتو، پوليس موجب ڪراچي کان ٺٽي ويندڙ روڊ تي تيز رفتار ڊمپر بي قابو ٿي اڳيان ويندڙ رڪشا ۽ وين کي ٽڪر هڻڻ بعد روڊ تي ٺهيل ڇپرن سان ٽڪرايو، شاھ لطيف ٿاڻي تي ڪيس داخل ڪيو ويوآهي، هوڏانهن ڪورنگي جي علائقي چمڙا چورنگي وٽ ٽرالر جي ٽڪر ۾ موٽر سائيڪل سوار شخص فوت ٿي ويو، ريسڪيو ذريعن موجب فوتي جي سڃاڻپ ناهي ٿي.
| ڪراچي ۾ 61850 گاڏين جو اِي چالان |
ڪراچي: ڪراچي ۾ هن وقت تائين 61850 گاڏيون اي چالان ٿيون، جن مان 41 هزار چالان ڪارن ۾ سيلٽ بيلٽ نه ٻڌڻ تان ٿيا. جڏهن ته هيلمٽ نه پائيندڙ 11 هزار موٽر سائيڪل سوار اي چالان ڪيا ويا، 590 سرڪاري ۽ 118 سنڌ پوليس جون گاڏيون اي چالان ٿيون.
| 2025ع: ڪراچي ۾ هيوي ٽريفڪ حادثن ۾229 شهري فوت |
ڪراچي: ڪراچي ۾ هلندڙ سال دوران 229 شهري هيوي ٽريفڪ جي حادثن ۾ حياتيون وڃائي ويٺا، ٽرالر حادثن ۾ سڀ کان وڌيڪ 87 شهري فوت ٿيا، جڏهن ته واٽر ٽينڪر سان 50، ڊمپر سان 41 ۽ بسن جي حادثن ۾ 31 شهري فوت ٿيا، ٽرئفڪ پوليس موجب هيوي گاڏيون ڪراچي ۾ رجسٽر ناهن، اُنهي ڪري اوور اسپيڊنگ جي صورت ۾سندن اي چالان نه پيو ٿئي.
پورٽ قاسم ۾ ٽريڪر نه لڳائيندڙ ڊمپر کي هڪ لک جو اي چالان
ڪراچي: پورٽ قاسم ۾ ٽريڪر نه لڳائيندڙ ڊمپر کي هڪ لک رپين جو اي چالان ڏنو ويو، ڊمپرن لاءِ ٻيو چالان 3 لکن جي ماليت جو آهي.