اڇڙي ٿر ۾ مختلف بيمارين منهن ڪڍيو: سوين ڍور مري ويا: ڀاڳين جا مٿي تي هٿ

کپرو (رپورٽ: آزاد راڄڙ) سانگهڙ جي کپري ۽ خيرپور جي ناري تعلقي جي اڇڙي ٿر ۾ چوپائي مال ۾ مختلف بيمارين منهن ڪڍيو، سوين ڍور   مري ويا: ڀاڳين جا مٿي تي هٿ ، ان ڏس ۾ 120 ڪلوميٽرن جي ايراِضي ۾ پکڙيل اڇڙي تڙ گجاهُو، سيڻاهُو، بٺاهُو، جاتُوجن وارو،کيراهُو، رڪڻاهُو، کارونئون آباد، کاروسعدائو ماڻڪاهو، ماڻڪور، ڪيتلور، ماڏيھر، ڪلرو، جيسار، کارڪي، جھونگائو تڙ ۾ چوپائي مال ۾ مختلف بيمارين ديرو ڄمائي ورتو آهي. لائيو اسٽاڪ کاتي جي ڊاڪٽرن  موجب جانورن ۾ پي پي آر، ايف ايم ڊي،  لمپي وائرس،  سومهاڙي، سيڙهاني ۽ ڳل ڳٽو  جون بيماريون آهن، وقت سر ويڪسين نه ٿيڻ ڪري ٻڪرين، رڍن ۽ ڍڳين ۾ اهي بيماريون پکڙيون آهن، هوڏانهن مالوندن موجب اڇڙي ٿر واري علائقي ۾ لائيو اسٽاڪ کاتي  جي ڪا اسپتال  نه هئڻ ڪري چوپائي مال کي بيمارين کان بچاءَ واري ويڪسين  ناهي ٿي جنهن سبب بيماري چوپائي  مال ۾ تيزي سان پکڙي رهي آهي، ٻاڪرو مال سڀ کان وڌيڪ متاثر ٿي رهيو آهي ان ڏس ۾ لائيو اسٽاڪ  سانگهڙ جي ڊپٽي ڊائريڪٽر علي اڪبر مري چيو ته جانورن ۾ سيزنل بيماريون  پي پي آر   ۽ ايم ايف ڊي  هلي رهيون آهن، اسان ضلعي ۾ ويڪسين ڪري رهيا آهيو،  کپري جو  اڇڙي ٿر ناري تعلقي  حوالي ٿيل آهي،  جڏهن ته ناري تعلقي جي  ڊپٽي ڊائريڪٽر ڊاڪٽر  غلام حيدر  رابطي تي چيو ته  اڇڙو ٿر خيرپور جي چونڊڪي کان عمر ڪوٽ تائين پکڙيل آهي،  اسان وٽ گاڏي ناهي،اسان  خانگي گاڏي ذريعي ويڪسين ڪندا آهيون، چوپائي مال ۾ وائرس پکڙيل آهي . سيزنل بيماريون به آهن، جن جي ويڪسين ڪريون پيا.