| اڳوڻي آءِ جي ثناءَ عباسي ۽ ايم اين اي وانڪواڻي جي زالن ۾ تڪرار تيز: ڪمشنر کي ٻيو خط |
ڪراچي (رپورٽ: حبيب جمالي) ليبرکاتي جي ماتحت اداري سيسي ۾ اڳوڻي آءِ جي ثناءَ عباسي ۽ پ پ جي ايم اين اي رميش ڪمار وانڪواڻي جي زالن ۾ تڪرار تيز، ڊاڪٽر سويتا طرفان ڪمشنر کي ٻيو خط، ڊاڪٽر رشيده کي هٽائڻ جو مطالبو، ان ڏس ۾ ايم اين اي رميش ڪمار جي زال ڊاڪٽر سويتا ڪمشنر سيسي کي خط لکي ڄاڻايو آهي ته سيسي ڪمشنر طرفان انڪوائري ڪاميٽي جڙڻ ۽ ايڪسپلينيشن ليٽر ملڻ باوجود ڊاڪٽر رشيده جو رويو تبديل نه ٿيو، سندس رويو وڌيڪ جارحاڻو ٿي ويو آهي، ڊاڪٽر رشيده سومرو اڃا به سي ايم او جي عهدي تي ويٺل آهي، کيس هٽايو وڃي، سي ايم او کي هٽائڻ بنا اڻڌري ۽ شفاف جاچ نه ٿي سگهندي، ڇاڪاڻ ته ڊاڪٽر رشيده جي جارحاڻي رويي ڪري آفيس ۾ خوف وارو ماحول آهي، ملازم جاچ ڪاميٽي آڏو اهڙي ماحول ۾ درست ۽ آزادي سان بيان رڪارڊ نه ڪرائي سگهندا. خط ۾ هن وڌيڪ چيو ته ڊاڪٽر رشيده سومرو سياسي ۽ سياسي اثر استعمال ڪندي پر کيس هٽائي سينئر کي سي ايم او مقرر ڪيو وڃي، ذريعن موجب ڪمشنر ڪراچي طرفان ڪمشنر سيسي کي تجويز ڏني وئي آهي ته سي ايم او ڊاڪٽر رشيده ۽ ڊاڪٽر سويتا کي عهدن تان هٽايو وڃي. ذريعن موجب ڪمشنر سيسي صوبائي وزير سعيد غني کي ڪمشنر ڪراچي جي اهڙي تجويز کان آگاهه ڪيو. جنهن تي صوبائي وزير ڪمشنر سيسي کي چيو ته انڪوائري مڪمل ٿيڻ کان اڳ ٻنهي کي عهدن تان هٽائڻ وارو فيصلو اصولي طور درست نه هوندو، جاچ رپورٽ جي روشني ۾ ڪارروائي ڪئي ويندي.