| باقراڻي ٿاڻي تي نوجوان فوتگي جي جاچ نه ٿي: وارثن کي ڌمڪيون |
لاڙڪاڻو (بيورو رپورٽ) باقراڻي ٿاڻي جي لاڪ اپ مان مهينو اڳ باقراڻي تعلقي جي ڳوٺ عبدالله لاشاري واسي نوجوان جو لاش هٿ اچڻ واري واقعي جي ايف آءِ آر داخل نه ٿيڻ توڙي پوليس جي مبينا ناانصافين خلاف نوجوان جي وارثن پاران پريس ڪلب اڳيان احتجاجي مظاهرو ڪيو ويو، نوجوان جي ڀاءُ عبيدالله لاشاري پنهنجي سئوٽ هادي بخش، مائٽن واجد علي لاشاري، احسان علي لاشاري ۽ ٻين چيو ته 12 ڊسمبر تي پوليس ڳوٺ تي چڙهائي ڪري جهيڙي جي ڪيس ۾ منهنجي 25 سالن جي نوجوان زبيدالله عرف زبير لاشاري کي گرفتار ڪري کڻي وئي،نوجوان جي آزادي جي لاءِ 2 لک رپيا رشوت طلب ڪئي وئي، رشوت نه ڏيڻ تان تشدد ڪري نوجوان کي ماريو ويو، مظاهرين چيو ته نوجوان کي ماري لاش لاڪ اپ ۾ ٽنگي ڪوڙو آپگهات جو ڊرامو رچايو ويو.هنن چيو ته قتل ۾ ملوث پوليس عملدار ۽ اهلڪار ڌمڪيون ڏئي مختلف طريقن سان حراسان ڪري رهيا آهن، هنن مطالبو ڪيو ته ملوث پوليس اهلڪارن خلاف ڪارروائي ڪري انصاف ڪيو وڃي.