بالي ووڊ لاءِ 2025ع تڪراري ثابت: 100 فلمون فلاپ: ڌرندر نوان رڪارڊ جوڙيا

ممبئي(ڪلچرل ڊيسڪ) بالي ووڊ لاءِ 2025ع پڻ تڪراري سال ثابت ٿيو، جنهن ۾ دبنگ اداڪار سلمان خان جي ‘سلطان’ ۽ ڪپل شرما جي ‘ڪس ڪِس ڪو پيار ڪرو تو’ سميت 100 کان وڌيڪ فلمون رليز ٿيون، بدقسمتي سان ڪيترن ئي مشهور اداڪارن جو فلمون پڻ فلاپ ٿيون، رپورٽن موجب باڪس آفيس تي فلاپ ٿيل ڪجهه فلمن کي وري او ٽي ٽي پليٽ فارم تي  سٺي موٽ ملي، اهي اتي سٺو ڪاروبار ڪرڻ ۾ ڪامياب رهيون، بالي ووڊ ۾ 2025ع ۾ ‘ڌرنڌر’ جهڙين پروپيگنڊا فلمن راڄ ڪيو.

ڌرندر 1000 ڪروڙ ڪمائيندي؟

ڀارتي ڊائريڪٽر آديته ڌر جي هدايتڪاري ۾ڪراچي جي قديم وسندي لياري جي  ‘گينگ وار’ تي ٺهيل پروپئگنڊا فلم ‘ڌرنڌر’ ۾ رحمان ڊڪيٽ جي حيثيت سان اڪشي کنا جي ڪارڪردگي کي تمام گهڻو ساراهيو ويو، سال جي آخري مهيني ڊسمبر جي 5 تاريخ تي رليز ٿيڻ باوجود اها فلم سال جي سڀ کان وڌيڪ ڪمائيندڙ فلمن ۾ شمار ڪئي وئي آهي، . 250 ڪروڙ رپين جي بجيٽ سان ٺهيل ‘ڌرنڌر’ 20 ڏينهن ۾ باڪس آفيس تي 707 ڪروڙ کان وڌيڪ جو ڪاروبار ڪري چڪي آهي، جڏهن ته فلم سڄي دنيا مان 907 ڪروڙ ميڙي چڪي آهي، فلم ۾ رڻوير سنگهه (حمزه علي مزاري)، اڪشي کنا (رحمان ڊڪيٽ)، سنجي دت (چوڌري اسلم) ۽ ارجن رامپال (حساس اداري جو آفيسر) مک ڪردار نڀايا آهن

 ڇاوا شواجي مهاراج کي جيئرو ڪيو ؟

بالي ووڊ ۾ هيل باڪس آفيس تي سڀ کان ڪامياب فلم ’ڇاوا‘ هئي، جنهن ۾ وڪي ڪوشل، رشميڪا مندنا ۽ اڪشي کنا مرڪزي ڪردار ادا ڪيا هئا، ڇاوا ۾ ڇترپتي شواجي مهاراج جي زندگي جون ڪجهه جھلڪيون ڏيکاريون ويون آهن، اها فلم ڇترپتي شواجي مهاراج جي موت کانپوءِ تخت سنڀالڻ جي سفر تي ٻڌل آهي، 14 فيبروري تي رليز ٿيل  ڇاوا 150 ڪروڙ جي وڏي بجيٽ سان ٺاهي وئي هئي، انهي فلم ڀارٿ ۾ 716 ڪروڙ جو ڪاروبار ڪيو، جڏهن ته سڄي دنيا ۾ 807 ڪروڙ ڪمائڻ ۾ ڪامياب ٿي.

سيارا 50 مان 570 ڪروڙ ٺاهيا ؟  

 رومانٽڪ فلم ’سيارا‘باڪس آفيس تي ڌماڪو ڪيو. نئين ۽ نامعلوم ڪاسٽ هجڻ باوجود، فلم پهرين ڪجهه ڏينهن ۾ 100 ڪروڙن جي  ڪلب ۾ شامل ٿي وئي. موهت سوري جي هدايتڪاري ۾ ٺهيل هن فلم ۾ چنڪي پانڊي جي ڀائٽين آهان پانڊي ۽ انيت پانڊي مرڪزي ڪردار نڀايو آهي، حيرت انگيز طور تي انهن جي پهرين فلم بلاڪ بسٽر ثابت ٿي، 50 ڪروڙن جي بجيٽ واري فلم ڀارت ۾ 398  ۽ دنيا ۾ 570 ڪروڙن جو ڪاروبار ڪرڻ ۾ ڪامياب ٿي.

وار 2 خرچ به ڪڍي نه سگهي !

ريٿڪ روشن ۽ ٽائيگر شيروف جي 2019 جي هٽ فلم ‘وار’ جي ابتڙ انهي فلم جو سيڪوئل وڏن نالن جي موجودگي  باوجود فلاپ ثابت ٿيو، وار 2 باڪس آفيس تي ٻين بالي ووڊ فلمن کان وڌيڪ ڪمائڻ ۾ ڪامياب ٿي. ايڪشن ٿرلر فلم ۾ ٽائيگر شيروف جي جاءِ تي جونيئر اين ٽي آر ۽ ريٿڪ روشن کي مرڪزي ڪردار ۾ شامل ڪيو ويو، جڏهن ته ڪيارا آڏواڻي، اشوتوش راڻا ۽ انيل ڪپور پڻ اهم ڪردار ادا ڪيا. هي فلم يش راج بينر هيٺ ٺهيل ‘اسپائي يونيورس’ جو حصو آهي، 400 ڪروڙن هجي بجيٽ واري  فلم ‘وار 2’ ڀارت ۾ 284  ۽ دنيا ۾ 366 ڪروڙ ڪمائڻ ۾ ڪامياب ٿي،

هائوس فل 5: نالو وڏو ديهه ويران  

وار 2 وانگر هائوس فل فرنچائز جي پنجين فلم پڻ ناڪام رهي، وڏي بجيٽ ۽ وڏي ڪاسٽ سبب اها ٻين فلمن جي ڀيٽ ۾ باڪس آفيس تي وڌيڪ ڪاروبار ڪرڻ ۾ ڪامياب ٿي، 2025ع ۾ ڪمائي جي لحاظ کان پنجون نمبر رهي،  . 6 جون تي رليز ٿيل هائوس فل 5 ۾ اڪشي ڪمار، اڀيشڪ بچن، رتيش ديشمک، سنجي دت، بوبي ديول، جيڪي شيروف، نانا پاٽيڪر، چنڪي پانڊي، فردين خان، نرگس فخري، جيڪلين فرنينڊز، سونم باجوه، چترا نگدا سنگهه، نورا فتحي ۽ ڪريتي خربندا مختلف ڪردارن ۾ نظر آيا،. 250 ڪروڙن جي بجيٽ واري فلم ڀارت مان 219  ۽ دنيا مان 290 ڪروڙ ڪمائڻ ۾ ڪامياب ٿي.