بجراڻي لغاري ۾ لطيفي لات: ڀٽائي جي 30 سرن  تيل ميلو مچايو ويو

مورو (ن پ ا) مورَي ڀرسان سنڌو درياهه جي ڪپ تي آباد ڳوٺ بجراڻي لغاري ۾ پنهنجي مدد پاڻ تحت هلندڙ جاڳرتا پبلڪ اسڪول جي سنڀاليندڙ علائقي ۾ مسڪين جهان خان کوسو نالي سان سڃاتو ويندڙ استاد مسڪين محمود لغاري طرفان آفاقي شاعر حضرت شاهه عبدالطيف ڀٽائي جي 30 سرن تي اسٽالن سان لطيفي ميلو لڳايو ويو، ميلي ۾ استادن، شاگردن، اديبن، ليکڪن، صحافين، شاعرن ۽ علائقي  جي ماڻهن وڏي انگ ۾ شرڪت ڪئي.  ميلي ۾ شاهه عبدالطيف ڀٽائي جي 30 سرن تي هر هڪ اسٽال تي شاگردن بهترين نموني سان ڀٽائي جي شاعري معنيٰ سان ٻڌائي، آيل مهمانن اسٽالن جو وزٽ ڪري، ٻارن کان سندن اسٽالن بابت شاعري ٻڌي ۽ شاگردن کي خوب داد ڏنو، مسڪين لغاري، ڪامريڊ ڪومل، آفتاب آزاد، علي رضا رند، مسعود لغاري، عبدالمجيد پنهور، غلام نبي لغاري، مبين وسطڙو، معشوق وسطڙو، استاد نويد ملاح، انيس خاصخيلي، ڪامريڊ آسيه لغاري، شائلا لغاري ۽ ٻين لڳايل ميلي جو افتتاح ڪيو، صحافين سان ڳالهائيندي اڳواڻن چي لغاري، ڪاشان مرتضيٰ، افسانه سنڌو، آرزو لغاري، فلڪ ناز، نشا، معصومه، بلقيس ڪورائي ۽ ٻين چيو ته شاهه عبداللطيف ڀٽائيءَ جو پيغام امن، محبت، ڀائيواري، ٻڌي، ايڪي ۽ رواداري جو پيغام آهي، شاهه جي پيغام کي عام ڪري دنيا کي بارود جي ڍير مان ڪڍي سگهجي ٿو، هنن چيو ته مسڪين محمود لغاري کي جس هجي، جنهن جي ڏينهن رات محنت کانپوءِ علائقي ۾ تعليم جو ڏيئو روشن ٿيو آهي، هنن وڌيڪ چيو ته سنڌ ڌرتي جيڪا ڪن فيڪون کان امن، مهمانوازي، سهپ، رواداري، ماڻهپي جو درس ڏيندڙ ڌرتي آهي، ان خوشحال سنڌ جا ماڻهو اڄ دربدري، بک، بدحالي واري زندگي گذارڻ تي مجبور آهن، سکي ستابي سنڌ جي معصوم ٻچڙن کي تعليم جهڙي زيور کان محروم ڪيو ويو آهي، هنن چيو ته استاد مسڪين محمود لغاري جيتوڻيڪ هڪ رضاڪار استاد آهي، جيڪو پنهنجي مدد پاڻ تحت جاڳرتا پبلڪ اسڪول ۾ پڙهائي ٿو، هنن چيو ته پنهنجي مدد پاڻ تحت هلندڙ جاڳرتا پبلڪ اسڪول ۾ سهولتن جي مڪمل کوٽ آهي، فرنيچر اڻپورو آهي، اسڪول کي نه چوديواري آهي، نه ئي واش روم آهي، نه بلڊنگ آهي ۽ نه پاڻي پيئڻ لاءِ نلڪو آهي، جڏهن ته 30 سرن تي لڳايل ميلي ۾ سڀنِي کان نمايان اسٽال ڪامريڊ اجي، ڪامريد نصيب، ڪامريڊ ڪومل، مِهتاب علي، ساگر سنڌي، بلقيس سنڌو، شاھزيب ۽ مهيش ڪمار بهترين اسٽال پيش ڪيا.