| بند ڪمرن واري پاليسي منظور ناهي، آئيني ترميمن خلاف سڀني کي گڏجي نڪرڻو پوندو: اپوزيشن اتحاد |
اسلام آباد(بيورو رپورٽ) تحريڪ تحفظ آئين پاڪستان جي اڳواڻن چيو آهي ته بند ڪمرن واري پاليسي منظور ناهي، سڀني کي گڏجي آئيني ترميم جي خلاف احتجاج ڪرڻ گهرجي، ۽ آزاد عدليه تي يقين رکندڙن سان گڏجي تحريڪ هلائينداسين. ضلعي ڪچهري جي ٻاهر خودڪش ڌماڪي جي معاملي ۾ ڊسٽرڪٽ اينڊ سيشن ڪورٽس اسلام آباد ۾ تحريڪ تحفظ آئين پاڪستان جو وفد ڪچهري پهتو. وفد ۾ محمود خان اچڪزئي، علامه راجه ناصر عباس، اسد قيصر، مصطفيٰ نواز کوکر شامل هئا. وفد وڪيلن سان يڪجهتيءَ جو اظهار ڪيو ۽ ڌماڪي ۾ شهيد ٿيلن لاءِ فاتحه پڙهي. مصطفيٰ نواز کوکر چيو ته ڪچهري جي شهيدن لاءِ ڪنهن به پيڪيج جو اعلان ناهي ڪيو ويو، زخمي پنهنجو علاج پاڻ ئي ڪرائي رهيا آهن. ڪچهري جي ٻاهر سيڪيورٽي انتظام به بهتر ناهن. پارليامينٽ آڏو پاليسي تي بحث ٿيڻ گهرجي. بند ڪمرن ۾ پاليسي ٺهڻ نه گهرجي، ڇو ته ان جو نقصان پاڪستان جي ماڻهن کي ٿيندو. 27هين آئيني ترميم جي خلاف احتجاج ڪيو ويندو ۽ آزاد عدليه تي يقين رکندڙن سان گڏ تحريڪ هلائينداسين. پي ٽي آءِ اڳواڻ اسد قيصر چيو ته اسلام آباد جوڊيشل ڪمپليڪس پنهنجي وڪيل برادري سان اظهار همدردي لاءِ آيا آهيون، شهرين کي تحفظ ڏيڻ حڪومت جي ذميواري آهي، پر حڪومت پنهنجي مخالفن خلاف ڪيس ٺاهڻ ۾ مصروف آهي. خودڪش حملي کانپوءِ ڪو به عهديدار جوڊيشل ڪمپليڪس ناهي آيو، شهيدن ۽ متاثرن لاءِ امدادي پيڪيج جو اعلان ڪيو وڃي. هن چيو ته 26هين ۽ 27هين آئيني ترميم ذريعي عدالتون مفلوج ٿي ويون آهن، انصاف جو نظام ختم ٿي وڃي ته عوام لاءِ ڪهڙو رستو بچندو، جتي انصاف جو نظام ختم ٿئي، اتي جنگل جو قانون لاڳو ٿئي ٿو. اسان 26هين ۽ 27هين آئيني ترميم جي خلاف ڀرپور آواز بلند اُٿارينداسين. جمعي ڏينهن 26هين ۽ 27هين آئيني ترميم خلاف ڪارور ڏينهن ملهايو ويندو. انصاف لاءِ آواز اُٿارڻ سڀني جي ذميواري آهي. اسد قيصر چيو ته باني پي ٽي آءِ ۽ بشري بي بي خلاف ڪوڙي پروپيگنڊو شروع ڪيو ويو آهي، اسان سياست جي بي توقيري نٿا چاهيون، الزام تراشي ۽ ڪوڙي پروپيگنڊو بند ٿيڻ گهرجي. اسان ڪنهن صورت به پنهنجي حق کان پٺتي نه هٽنداسين. هن چيو ته اسان 1973ع جي آئين کي عملي طور تي بحال ڪرائڻ جو عزم ڪيو آهي، اسان کي اميد هئي ته پيپلز پارٽي پنهنجي اقتدار کي قربان ڪري عوام سان گڏ بيهندي، نواز شريف کان به اميدون هيون پر هن پڻ پنهنجي ڀاءُ ۽ ڌيءُ جي سبب سمجهوتو ڪيو. آئين ۽ قانون جي بالادستي صرف 1973ع جي آئين تحت ئي هوندي.