بينزيما، الدوساري ۽ مهريز پوئتي رونالڊو بهترين فٽبالر

دبئي (اسپورٽس نيوز) پرتگال جي عالمي شهرت يافته فٽبال ليجنڊ ڪرسٽيانو رونالڊو مسلسل ٽيون ڀيرو وچ اوڀر جي فٽبالر آف دي ايئر جو ايوارڊ کٽيو آهي. پرتگالي اسٽار کي دبئي ۾ منعقد ٿيل گلوب ساڪر ايوارڊ تقريب ۾ ايوارڊ سان نوازيو ويو، جتي هن ڪريم بينزيما، سليم الدوساري ۽ رياض مهريز جهڙن مشهور رانديگرن کي پوئتي ڇڏيو. سال 2025 دوران رونالڊو سڀني مقابلن ۾ ڪل 40 گول ڪيا. هو هن وقت سعودي عرب جي معروف ڪلب النصر جي نمائندگي ڪري رهيو آهي ۽ سندس معاهدو 2027 جي وچ تائين جاري رهندو. ايوارڊ حاصل ڪندي، 40 سالن جي اسٽار فٽبالر هڪ جذباتي تقرير ۾ چيو ته وڌيڪ کيڏڻ تمام ڏکيو آهي، پر منهنجو مورل بلند آهي ۽ مان اڳتي وڌڻ لاءِ تيار آهيان. رونالڊو چيو ته مان وچ اوڀر ۾ کيڏان ٿو يا يورپ ۾، مون کي فٽبال کيڏڻ، گول ڪرڻ ۽ ٽرافيون کٽڻ پسند آهي. هن وڌيڪ چيو ته توهان سڀني کي خبر آهي ته منهنجو مقصد ڇا آهي، مان وڌيڪ ٽرافيون کٽڻ ۽ هزار گول ڪرڻ چاهيان ٿو، جيڪڏهن مان زخمي نه ٿيس ته مان ضرور هزار گول ڪندس، انشاءَ الله.