بڊنگ جي عمل کي لائيو نشر ڪرڻ ان جي شفافيت جو واضح ثبوت آهي: شهباز شريف

اسلام آباد(اسپورٽس نيوز) وزيراعظم محمد شهباز شريف سان پاڪستان سپر ليگ ۾ ٻن نئين ٽيمن جي بڊنگ کٽيندڙ فرمن جي نمائندن ملاقات ڪئي آهي. نمائندن ۾ سيالڪوٽ ٽيم خريد ڪندڙ فرم ‘او زي ڊولپر جي حمزه مجيد ۽ حيدرآباد ٽيم خريد ڪندڙ فرم ‘ايف ڪي ايس’ جو فواد سرور شامل هئا.وزيراعظم ٻنهي ٽيمن جي نمائندن کي مبارڪباد ڏني ۽ انهن لاءِ نيڪ خواهشن جو اظهار ڪيو.وزيراعظم پاڪستان ڪرڪيٽ بورڊ جي چيئرمين محسن نقوي ۽ پي سي بي انتظاميا کي ڪامياب بڊنگ جي عمل تي خراج تحسين پيش ڪيو.وزيراعظم چيو ته نئين پي ايس ايل ٽيمن جي بڊنگ جي عمل کي ٽيليويزن تي لائيو نشر ڪيو ويو، جيڪو ان جي شفافيت جو واضح ثبوت آهي.شهباز شريف چيو ته ٻن نئين ٽيمن جي شموليت گراس روٽ ليول تي ڪرڪيٽ جي فروغ ۽ نئين ٽيلنٽ جي اڀرڻ ۾ مدد ڪندي، هن چيو ته اهو تمام گهڻو خوش آئند آهي ته بين الاقوامي فرمون انهن ٻنهي ٽيمن لاءِ ٻولي ڏيڻ لاءِ اڳتي آيون آهن، هن عمل پاڪستان ۾ پرڏيهي سيڙپڪاري کي فروغ ڏنو آهي.وزيراعظم چيو ته ٻاهرين ملڪن ۾ رهندڙ پاڪستانين هميشه ملڪ جي ترقي ۾ اهم ڪردار ادا ڪيو آهي.شهباز شريف چيو ته ملڪي ۽ بين الاقوامي فرمن نئين پي ايس ايل ٽيمن لاءِ ٻولي جي عمل ۾ دلچسپي ڏيکاري آهي، ان جو اندازو پي ايس ايل جي عالمي سطح تي مقبوليت مان لڳائي سگهجي ٿو.وفاقي گهرو وزير ۽ چيئرمين پي سي بي محسن نقوي ۽ اطلاعات ۽ نشريات جو وفاقي وزير عطاءُ الله تارڙ پڻ اجلاس ۾ موجود هئا.