ترقياتي منصوبن ۾ ڪرپشن: نيشنل هاءِ وي اٿارٽي، پاڻي وسيلن ۽ پاور ڊويزن جي فنڊنگ بند ڪرڻ جي هدايت

اسلام آباد (بيورو رپورٽ) اقتصادي معاملن بابت سينيٽ جي اسٽيڊنگ ڪميٽي جو اجلاس چيئرمين سيف الله ابڙو جي صدارت هيٺ ٿيو. سنڌ واٽر اينڊ ايگريڪلچر ٽرانفارميشن پروجيڪٽ متعلق بريفنگ ڏني وئي. جنهن تي سينيٽر وقار مهدي چيو ته بريفنگ پيپر ڪميٽي۽ نه ئي اقتصادي معاملن واري وزارت کي ڏنا ويا آهن، اِن تي ڪهڙو بحث ٿيندو. ڪميٽي چيئرمين چيو ته چيف سيڪريٽري سنڌ کي لکيو وڃي ته جڏهن ايجنڊا ايندي آهي ته بريفنگ پيپر ڇو ناهن ايندا. اقتصادي معاملن کي به نه ڏنا ويا، اسان کي به خبر ناهي ته پوءِ پروجيڪٽ جا تفصيل ڪنهن کي ڏنا ويا. اقتصادي معاملن واري وزارت جي سيڪريٽري کي اين ايڇ اي، آبي وسيلن ۽ پاور ڊويزن جي فنڊنگ بند ڪرڻ جي هدايت ڪريان ٿو. سنڌ واٽر اينڊ ايگريڪلچر ٽرانسفارميشن جي اختيارين چيو ته ٻوڏ متاثرن جي فصل پوکڻ لاءِ معاونت بابت اسڪيم هئي. ڪميٽي ميمبر چيو ته ڪافي ماڻهو آهن جن کي هن وقت تائين پئسا ناهن مليا. سينيٽر روبينه خالد پڇيو ته اوهان بينظير انڪم سپورٽ پروگرام جي ڊيٽا استعمال ڪئي آهي. اختيارين جواب ڏنو ته اسان پنهنجي سروي ڪري ڊيٽا گڏ ڪريون. روبينا خالد چيو ته اوهان وٽ ته پوري ڄاڻ به ناهي ته پئسا ڏيڻ جو طريقيڪار ۽ دائره اختيار ڇا هو. سينيٽر ڪامل علي آغا چيو ته بي آءِ ايس پي جو تصديق ٿيل ڊيٽا هوندو آهي. اِن تي ڪا شڪايت ناهي هوندي. چيئرمين ڪميٽي چيو ته نگران وزير محمد علي ڪميٽي سان غلط بياني ڪئي ته وزيراعظم کي لکيو ويو آهي. پي آءِ اي 10 ارب ۾ وڪڻي رهيو هو، محمد علي جون ڪراچي ۾ بلڊنگز آهن. اِن کي ائين وڪرو ڪريو ته خبر پوندي. وزير اعظم کي لکنداسين ته محمد علي ڪميٽي ۾ غلط بياني ڪئي هئي. اجلاس ۾ ملتان جي تاريخي ورثي جي بحالي لاءِ مختص ڪيل فنڊز جاري ڪرڻ وارو معاملو بحث هيٺ آيو. لاڳاپيل اختيارين بريفنگ ڏيندي ٻڌايو ته منصوبي لاءِ مجموعي طور تي 8276 ملين رپيا مختص ڪيا ويا هئا، 2011 ۾ منصوبي لاءِ 850 ملين رپيا جاري ڪيا ويا هئا، ابتدائي طور تي منصوبي لاءِ 850 ملين رکيا ويا هئا جيڪي استعمال ٿي ويا. ڪميٽي چيئرمين چيو ته 2011 ۾ پئسا اوهان وٽ آيا، فزيبلٽي رپورٽ ڏني وڃي. پروجيڪٽ ڊائريڪٽر چيو ته ٻئي فيز جي 251 ملين تي عملدرآمد جي رپورٽ اسان وٽ آهي. ڪميٽي چيئرمين چيو ته مان اوهان کان 850 ملين جي فزيبلٽي رپورٽ متعلق پڇان پيو.