توانائي جي ڌار ڌار ادارن واري رٿابندي ختم: اختيار پاور ڊويزن حوالي: ڪابينا ڪميٽي منظوري ڏئي ڇڏي

اسلام آباد (بيورو رپورٽ) ڪابينا جي توانائي ڪميٽي هڪ ٻئين اهم ۽ تاريخي منظوري به ڏئي ڇڏي۔ ملڪ ۾ بجلي جي ويلنگ بابت اهم فيصلو ڪيو ويو آهي، جنهن کان پوءِ ملڪ ۾ آزاد انرجي مارڪيٽ جي قيام ۽ انکي هٿي وٺرائڻ جو بنياد پئجي ويو آهي. هن فيصلي تحت مسابقتي عمل، منظوري، شرڪت ۽ ٻين اهم معاملن جي به منظوري ڏني وئي آهي۔ ان فيصلي سان ملڪ ۾ بجلي جي نيلامي متعلق طريقيڪار CTBCM جي منظوري ملي وئي آهي۔ حڪومت جي واعدن مطابق هاڻي نوان بجلي جا معاهدا نه ڪيا ويندا۔ هاڻي حڪومت بجلي جي خريداري واري عمل مان نڪري وئي آهي۔ هن فيصلي کان پوءِ 800 ميگاواٽ جي مسابقتي ٻولي جو عمل شروع ٿي ويندو۔ هن مسابقتي عمل کي شفاف رکيو ويو آهي ته جيئن وڌ کان وڌ ماڻهو ان ۾ شرڪت ڪري سگهن۔ پاور ڊويزن جي اداري آئيسمو (ISMO) کي آڪشن جي ذميواري سونپي وئي آهي۔ ملڪ ۾ ڊگهي مدي ۽ اثرائتي توانائي منصوبابندي طرف هڪ اهم اڳڀرائي ٿي آهي۔ ڪابينا جي توانائي بابت ڪميٽي انٽيگريٽيڊ انرجي پلاننگ بابت وڏو فيصلو ڪيو آهي۔ وفاق ۽ صوبن جي توانائي ضرورتن، استعمال ۽ پيداوار بابت گڏيل منصوبابندي ڪئي ويندي۔ هاڻي تائين مختلف ادارا الڳ الڳ انرجي پلاننگ ڪندا رهيا آهن، جامع انرجي پلاننگ لاءِ پاور ڊويزن جي اداري PPMC ۾ سيڪريٽريٽ قائم ڪيو ويندو۔ هاڻي ملڪ ۾ توانائي جي منصوبابندي هڪ ئي اداري ۽ هڪ ئي هنڌ تان ڪئي ويندي۔ هن فيصلي سان پاليسي ساز ادارن کي جامع ۽ بهتر سهائتا حاصل ٿيندي۔ڪابينا ڪميٽي انرجي پلاننگ جي مڪمل ذميواري پاور ڊويزن کي سونپي آهي۔ پاور ڊويزن کي گرين انرجي سميت سڀني توانائي ذريعن جي فروغ ۾ سهولت حاصل ٿيندي. ٻئي طرف وزيراعظم  شهباز شريف جي صدارت هيٺ توانائي بابت ڪابينا جي ذيلي ڪميٽي جي سفارشن تي جائزو وٺڻ لاءِ اجلاس منعقد ٿيو. وزيراعظم جامع قومي انرجي پلان جي تياري لاءِ لاڳاپيل وزارتن ۽ صوبن سان صلاح مشوري سان ڪم ڪرڻ جي اصولي منظوري ڏئي ڇڏي آهي۔ وزيراعظم شهباز شريف چيو ته قومي انرجي پلان جي تياري ۾ صنعتن کي گهٽ کان گهٽ لاڳت تي بجلي جي فراهمي ۽ گهريلو صارفين لاءِ سهولتون حڪومت جي اولين ترجيحن ۾ شامل آهن، اجلاس ۾ بريفنگ ڏيندي ٻڌايو ويو ته قومي انرجي پلان لاءِ سڀني وزارتن سان ابتدائي صلاح مشوري جو عمل جاري آهي، اجلاس ۾ وفاقي وزير احسن اقبال، سردار اويس احمد خان لغاري، علي پرويز ملڪ، احد خان چيما، صوبن جي چيف سيڪريٽريز ۽ ٻيا لاڳاپيل سرڪاري عملدارن شرڪت ڪئي.