جبري گمشدگين ۽ جوابدارن کي 24 ڪلاڪن اندر مئجسٽريٽ آڏو پيش ڪرڻ لاءِ نئون مڪينزم آڻڻ جو فيصلو

اسلام آباد (بيورو رپورٽ) چيف جسٽس آف پاڪستان يحيٰ آفريدي جي صدارت هيٺ قومي عدالتي پاليسي ساز ڪميٽي جو اجلاس منعقد ٿيو، جنهن ۾ جبري گمشدگين ۽ ڪمرشل ڪيسن تي مؤثر ردعمل ڏيڻ جو فيصلو ڪيو ويو۔ چيف جسٽس آف پاڪستان يحيٰ آفريدي جي صدارت هيٺ نيشنل جوڊيشل پاليسي ساز ڪميٽي جو 56هون اجلاس منعقد ٿيو، جنهن ۾ سڀني هاءِ ڪورٽن جي چيف جسٽسز ۽ وفاقي آئيني عدالت جي چيف جسٽس امين الدين شرڪت ڪئي۔ اجلاس جي پڌرائي مطابق ڪميٽي جبري گمشدگين جي ڪيسن تي مؤثر اداراجاتي ردعمل ڏيڻ ۽ گرفتار جوابدارن کي 24 ڪلاڪن اندر مئجسٽريٽ آڏو پيش نه ڪرڻ جي صورت ۾ نئون ميڪنزم متعارف ڪرائڻ جو فيصلو ڪيو آهي۔ ٻين اهم فيصلن ۾ ڪمرشل ڪيسن جي جلد فيصلي لاءِ ڪمرشل لٽيگيشن ڪوريڊور لاڳو ڪرڻ، ڪيسن جي فيصلن لاءِ مقرر ڪيل ٽائيم لائينز تي سختي سان عملدرآمد، ۽ عدالتن ۾ آرٽيفيشل انٽيليجنس جي استعمال لاءِ قومي گائيڊ لائينز جي تياري شامل آهن. ڪميٽي لاهور هاءِ ڪورٽ پاران 4 لک 65 هزار کان وڌيڪ ڪيس اُڪلائڻ جي رڪارڊ کي ساراهيو، پشاور هاءِ ڪورٽ جي وراثتي ڪيسن جي نظام جي تعريف ڪئي ۽ سڀني ضلعي عدالتن ۾ اي فائلنگ فوري طور شروع ڪرڻ جي منظوري ڏني. 2019 تائين جا سڀ پراڻا وراثتي ڪيسن کي 30 ڏينهن اندر اُڪلائڻ جي هدايت ڪئي وئي ۽ جيل سڌارن بابت صوبائي حڪومتن سان صلاح مشوري جو به فيصلو ڪيو ويو.