جسٽس  ظفر جج بحالي تحريڪ ۾ حصو ورتو، کاٻي ڌر ۾ به رهيو

حيدرآباد  (رپورٽ: فيض کوسو)  جڊيشل ڪميشن آف پاڪستان، سنڌ هاءِ ڪورٽ جي وقتي چيف جسٽس، جسٽس ظفر احمد  راجپوت کي سنڌ جو چيف جسٽس مقرر ڪرڻ جي سفارش ڪئي آهي. جسٽس ظفر احمد راجپوت جو تعلق سنڌ جي ٻئي نمبر وڏي شهر حيدرآباد سان آهي. سندس پيدائش جو سن 16 آڪٽوبر 1965ع آهي. هن پنهنجي ابتدائي تعليم به حيدرآباد مان حاصل ڪئي. جسٽس ظفر احمد راجپوت بيچلر آف آرٽس جي ڊگري سٽي  ڪاليج، ايل ايل بي جي ڊگري جناح لا ڪاليج، بين القوامي لاڳاپن ۾ ماسٽرز جي ڊگري سنڌ يونيورسٽي ڄامشورو ۽ اسلامي قانون جو هڪ سال وارو ڪورس اسلام آباد جي بين القوامي اسلامي يونيورسٽي جي شريعت اڪيڊمي مان پاس ڪيو. هو 1990ع ۾ وڪيل طور رجسٽرڊ ٿيو ۽ هن 2001ع ۾ هاءِ ڪورٽ جي وڪالت لاءِ لائسنس حاصل ڪيو. جسٽس ظفر احمد راجپوت 12 سالن تائين سنڌ لا ڪاليج ۾ ليڪچرار ۽ اسسٽنٽ پروفيسر طور خدمتون انجام ڏنيون. کيس ڪيٿوليڪ ڊائسز آف پاڪستان ۽ چرچ آف پاڪستان حيدرآباد توڙي ٻين مختلف مالي ادارن ۽ ميونسپل انتظاميا جي ليگل ايڊوائيزر طور به خدمتون انجام ڏيڻ جو اعزاز حاصل رهيو آهي. جسٽس ظفر احمد راجپوت 1993ع ۾ جڊيشل مئجسٽريٽ مقرر ٿيو ۽ 2000ع ۾ سينيئر سول جج طور ترقي ماڻي. هن 2001ع ۾ جج جي عهدي تان استعيفيٰ ڏئي وڪالت جي پيش کي اپنايو. 31 آگسٽ 2013ع تي هو سنڌ هاءِ ڪورٽ جو جج مقرر ٿيو. هاءِ ڪورٽ جي جج جي حيثيت ۾ هن ملڪيتن، گهرو معاملن، ثالثي، بئنڪنگ توڙي فوجداري قانون سميت انساني حقن ۽ شهري آزادي سان لاڳاپيل 12 هزار کان وڌيڪ ڪيسن جا فيصلا ڪيا. جسٽس ظفر احمد راجپوت 15 سيپٽمبر 2025ع تي سنڌ هاءِ ڪورٽ جو وقتي چيف جسٽس مقرر ٿيو ۽ هاڻي کيس سنڌ هاءِ ڪورٽ جو چيف جسٽس مقرر ڪرڻ جي سفارش ڪئي وئي آهي. حيدرآباد سان تعلق رکندڙ جسٽس ظفر احمد راجپوت انساني حقن لاءِ جاکوڙيندڙ رهيو آهي. هن جنرل پرويز مشرف جي دور ۾ ججن جي بحالي واري تحريڪ ۾ حصو ورتو ۽ ايم آر ڊي جي تحريڪ ۾ به هن سرگرمي ڏيکاري. هو کاٻي ڌر جي سياست سان لاڳاپيل رهيو آهي. جسٽس ظفر احمد راجپوت سدائين قانون ۽ انصاف جي بالادستي لاءِ پتوڙيندو رهيو آهي. وقت جي ڦرندڙ ڦيٿي کيس سنڌ ۾ انصاف جي اعليٰ مسند عطا ڪئي آهي. ساڻس محبتن ۽ خلوص جو اظهار ڪندڙ ماڻهن کي اهو يقين آهي ته جسٽس ظفر احمد راجپوت جا بطور چيف جسٽس فيصلا ضرور سنڌ جي پيڙهيل ۽ انصاف کان  محروم ماڻهن جي دردن جو درمان ثابت ٿيندا.