جماعت اسلامي پاران عيد بعد عوام دشمن فيصلن خلاف تحريڪ جو اعلان

لاڙڪاڻو (بيورو رپورٽ) جماعت اسلامي سنڌ جو امير ڪاشف سعيد شيخ ڪراچي کان ڪشمور تائين سنڌ ۾ وڌندڙ بدامني، اغوا، ڦرن، لا قانونيت، ڌاڙيل راڄ ۽ قبيلائي جهيڙن سبب قيمتي جاني نقصان کي حڪومتي ناڪامي قرار ڏيندي مطالبو ڪيو ته حڪومت شهرين جي جان ۽ مال جي تحفظ، ڏوهن ۽ قبيلائي جهيڙن جي خاتمي لاءِ اثرائتا قدم کڻي ۽ پنهنجي ذميواري پوري ڪري. هن چيو ته لاڙڪاڻو ۾ تاريخي شخصيتن مولانا جان محمد عباسي ۽ قاضي فضل الله جي نالن سان منسوب پارڪن تي قبضي جي ڪوشش مذمت جوڳو آهي ۽ تاريخ سان ڇيڙڇاڙ جي برابر آهي. هن چيو ته غزه کان پوءِ ايران جو الميو ان ڳالهه کي ظاهر ڪري ٿو ته جيڪڏهن مسلم امت هاڻي به اتحاد ۽ يڪجهتي اختيار نه ڪئي ته مسئلا وڌيڪ وڌندا.  هن اعلان ڪيو ته حافظ نعيم الرحمان جي اڳواڻيءَ ۾ جماعت اسلامي عيد کان پوءِ حڪومتي عوام دشمن فيصلن خلاف ۽ عوامي مسئلن جي حل لاءِ ڀرپور احتجاجي تحريڪ شروع ڪندي. اهڙن خيالن جو اظهار هن لاڙڪاڻي جي مقامي هال ۾ صحافين جي مان ۾ ڏنل افطار ڊنر کي خطاب ڪندي ڪيو.