| جنهن آفيسر کي گھرايون اهو پرڏيهه هليو ٿو وڃي، خانگي اسڪولن ۾ اسڪالرشپ مڪينزم ڇا آهي؟ هاءِ ڪورٽ |
سکر (بيورو رپورٽ) سنڌ هاءِ ڪورٽ سکر ۾ جسٽس ذوالفقار علي سانگي ۽ جسٽس عبدالحامد ڀرڳڙي تي مشتمل آئيني تعليم کاتي جي ملازمن طرفان پرائيويٽ اسڪول هلائڻ خلاف داخل ڪرايل درخواست تي ٻڌڻي ڪئي، عدالت جي طلب ڪرڻ باوجود سيڪريٽري تعليم پيش نه ٿيو، سرڪاري وڪيل عدالت کي آگاهه ڪيو ته سيڪريٽري تعليم ملڪ کان ٻاهر آهي، جنهن تي عدالت چيو ته حيرت آهي جنهن آفيسر کي عدالت گهرائي ٿي اهو ٻاهر ٿو هليو وڃي، هي پنجون آفيسر آهي جيڪو عدالت ۾ حاضر نه ٿيو آهي، ڇو نه شوڪاز نوٽيس جاري ڪيون، سرڪاري وڪيل عدالت کي آگاهه ڪيو ته سندس نمائندي طور اسپيشل سيڪريٽري پيش ٿيو آهي، عدالت راڻيپور ۾ سرڪاري ملازم انيل حيدر طرفان خانگي اسڪول هلائڻ بابت اسپيشل سيڪريٽري کان پڇاڻو ڪيو، جنهن تصديق ڪئي ته اهو درست آهي پر تعليم کاتي ڪارروائي ڪندي خانگي اسڪول بند ڪرائي ڇڏيو آهي، عدالت پڇاڻو ڪيو ته سرڪاري ملازم خلاف ڪهڙو ايڪشن کنيو ويو، اوهان ڪو به قدم ڇو ناهي کنيو، عدالت کي ٻڌايو ته صوبي ۾ ڪيترا خانگي اسڪول آهن، انهن مان ڪيترا پرائمري، مڊل ۽ هائير سيڪينڊري طور ايڪٽو آهن، خانگي اسڪولن ۾ انرولمينٽ ڪيتري آهي، ڇا خانگي اسڪولن ۾ يتيم ۽ غريب ٻارن کي مفت تعليم ڏني وڃي ٿي، خانگي اسڪولن ۾ 10 سيڪڙو غريب ۽ يتيم ٻارن جي داخلا تي عمل ڇو نه ڪيو ويو آهي، خانگي اسڪولن ۾ اسڪالرشپ يا سرڪاري وظيفي ڏيڻ جو مڪينزم ڇا آهي، لاڳاپيل عملدار عدالت کي آگاهه ڪيو ته خانگي اسڪولن جي حوالي سان پاليسي جوڙيل آهي، عدالت کي استدعا ڪئي ته تفصيلي رپورٽ جمع ڪرائڻ لاءِ مهلت ڏني وڃي، جنهن کانپوءِ عدالت ڪيس جي ٻڌڻي پهرين ڊسمبر تائين ملتوي ڪري ڇڏي.