جهڏو لڳ پ پ جو يوسي وائيس چيئرمين گرفتار: شهر بند: ڌرڻو

جهڏو(رپورٽر)جهڏو ويجهو پيپلزپارٽي جو يوسي وائيس چيئرمين ۽ واپاري ممتاز ميمڻ کي پنگريو پوليس گرفتار ڪري ورتو، شهرين ڪاروبار بند ڪري ڌرڻو هنيو

 حيات خاصخيلي شهر مان يوسي 27 جو وائيس چيئرمين ۽ واپاري ممتاز ميمڻ کي پنگريو پوليس دڪان تان گرفتار ڪري کڻي وئي گرفتاري خلاف واپارين پاران شٽر بند هڙتال ڪري ڇڏي

شهرين جهڏو بدين روڊ تي ٽائر ساڙي رڪاوٽون وجهي روڊ بلاڪ ڪري ڌرڻو هڻي سخت احتجاج شروع ڪري ڏنيو آهي ڌرڻي سبب روڊ بلاڪ ٿي ويو آهي

 احتجاج ۾ شامل واپارين آصف ميمڻ، قادر ڀنڀرو، باغي راهمون، راجا ميمڻ، نياز کوسو ۽ ٻين جو چوڻ آهي ته پنگريو پوليس ممتاز ميمڻ کي سندس ريزڪي  دڪان تان گرفتار ڪري وئي آهي سندس دڪان تان ڪا به اهڙي غيرقانوني شئي هٿ نه آئي آهي ان باوجود کيس بي گناهه گرفتار ڪري ناانصافي ڪئي وئي آهي

 هنن مطالبو ڪيو ته نوٽيس وٺي ممتاز ميمڻ کي فوري طور آزاد ڪيو وڃي ٻي صورت ۾ احتجاج جاري رکيو ويندو

هوڏانهن پوليس جو موقف وٺڻ لاءِ ايس ايڇ او پنگريو مولچند ميگھواڙ سان رابطو ڪيو ويو پر فون اٽينڊ نه ٿيڻ ڪري موقف نه مليو.