| جوابدار فوت ٿي ويا: مرتضيٰ قتل ڪيس ۾ پوليس رپورٽ پيش |
ڪراچي (اسٽاف رپورٽر) پ پ (ش ڀ) جي باني چيئرمين شهيد مير مرتضيٰ ڀٽو جي قتل ڪيس بابت پوليس پاران سنڌ هاءِ ڪورٽ ۾ رپورٽ پيش ڪئي وئي، جنهن چيو ويو آهي ته ڪيس ۾ نامزد شاهد حيات، شبير احمد قائمخاني، آغا محمد جميل ۽ مسعود شريف فوت ٿي چڪا آهن، هوڏانهن ڪيس جي فريادي جي اپيلن تي ٻڌڻي ٿي، درخواستگذارن جي وڪيلن وضاحت ڪئي ته ڪيس ۾ ڪيترائي جوابدار فوت ٿي چڪا آهن، درخواستگذار جي وڪيل چيو ته مرحوم پوليس آفيسر شاهد حيات خلاف اپيل سان ڳنڍيل دستاويز پڙهڻ لائق ناهن، عدالت اپيل سان درست دستاويز ڳنڍڻ جي هدايت ڪري ڇڏي, ياد رهي ته مرتضيٰ ڀٽو کي 20 سيپٽمبر 1996 تي ٻه تلوار ويجهو پوليس مقابلي ۾ قتل ڪيو ويو هو، واقعي جا ٻه الڳ الڳ ڪيس داخل ڪيا ويا هئا،هڪ ڪيس حڪومت پاران ۽ ٻيو ڪيس مرتضيٰ ڀٽو جي خاندان جي شڪايت تي داخل ڪيو ويو هو، ٽرائل ڪورٽ ٻنهي ڪيسن ۾ سڀني جوابدارن کي بري ڪري ڇڏيو هو, عدالت اڳڀرائي واري رپورٽ طلب ڪندي وڪيلن جي درخواست تي اپيل جي ٻڌڻي 27 جنوري 2026 تائين ملتوي ڪري ڇڏي