جيڪي به فيصلا ڪيا آهن جماعت جي ڀلائي لاءِ ڪيا آهن: پيرپاڳارو

صالح پٽ (ن پ ا) صالح پٽ ۾ حرن جي روحاني پيشوا پير صبغت الله شاهه راشدي روحاني سفر دوران صالح پٽ لڳ ڳوٺ ساھي پٽ ۾ صدورو فقير مھر جي پڪي دعوت تي پھتو، جتي پيرپاڳاري مريدن کي ديدار ڪرايو،  جماعت کي خطاب ڪندي پير پاڳاري چيو ته آئون پنهنجي نياڻين کي جماعت ۾ ھميشه پاڻ سان گڏ وٺي ايندو آھيان، ڇاڪاڻ جو جماعت پنھنجي نياڻين سميت مون ڏانھن اچي ٿي، پير پاڳاري چيو ته گذريل ٻارنهن سالن کان مان ڪافي برداشت ڪيو، جنھن کانپوءِ ڪجھه اھڙا فيصلا ڪيا، جيڪي جماعت جي ڀلائي لاءِ هئا پر اهي فيصلا ڪجھه جماعت کي وڻيا ڪجھه ماڻهن کي نه وڻيا، هن چيو ته نياڻين جي تعليم تي ڌيان ڏيو، ڪجھه نياڻيون نياڻيون ڊاڪٽرياڻيون ته ڪجھه پروفيسر ٿي چڪيون آھن ان ڳالھه جي بي حد خوشي ٿي آھي،اھڙا ڇوڪرا جيڪي تعليم ۾ ڪمزور آھن ته کين ڪنھن ننڍي وڏي ھنر ۾ لڳائي ڇڏيو، فصل جي ڀيٽ ۾ چوپايو مال ڪمائي ٿو، جنهن ڪري چوپايو مال ڌاريو، هن چيو ته جماعت خانه ٺهرايا جئين جماعت کي تڪليف نه اچي، گذريل برسات ۾ ڇت ٽمي پئي سوچيو  آهي ته شاگردن کي نقصان رسي ان کان اول مدرسو ٺھرائڻ جو بنياد رکان، توھان سڄي جماعت کي مدرسي جي ڀلاري ڪم ۾ ڀائيواري جي صلاح ڪريان ٿو جماعت تي ڪو زور زبردستي ناھي، وس آهر ڀلائي جي ڪم ۾ ھڪ رپيو به توهان جو ڇوٽڪاري جو سبب بڻجندو. ڇو ته جيڪڏهن اتي ڪو به ديني تعليم پرائيندو ته ان جو ثواب به توھان کي ملندو رھندو، پاڙيسرين جو وڌ کان وڌ خيال رکيو وڃي.