حيدرآباد ۾ ڦٽاڪن جي فيڪٽري ۾ ڌماڪي بعد باهه، 6 پورهيت سڙي فوت، 8 ڄڻا سخت زخمي

حيدرآباد(بيورو رپورٽ) لطيف آباد بي سيڪشن ٿاڻي جي حد لغاري ڳوٺ درياءَ جي ڪپ تي ڦٽاڪن جي فيڪٽري ۾ زوردار ڌماڪي بعد باھه لڳي وئي، جنهن ۾ ابتدائي طور ڪيترائي ماڻھو زخمي ٿي پيا، جتي موجود علائقي واسين جو چوڻ آهي ته 6 ڄڻا سڙي فوت ٿي ويا، جن مان ٻن ڄڻن جي سڃاڻپ ٿي وئي آهي، جن ۾ ھڪ عبدالرشيد ۽ ٻيو وارث قريشي شامل آهن، واقعي ۾ 8 ڄڻا زخمي ٿي پيا آهن، جن ۾ هڪ عورت نصرت به شامل آهي، ٻين زخمين جي سڃاڻپ مشتاق، وقاص، انس، ڪاشف، شهروز، رشيد ۽ نعيم جي نالن سان ٿي آهي. ٻڌايو پيو وڃي ته لطيف آباد فيڪٽري ڌماڪي ۾ زخمي ٿيلن ۾ 50 ورهين جي نصرت زال ارشد جو جسم 100 سيڪڙو سڙي ويو آهي، جڏهن ته نعيم ولد محمد يوسف عمر 50 سال جو جسم به 100 سيڪڙو سڙيل آهي، شيراز ولد ثناءِ الله عمر 35 سال به 100 سيڪڙو سڙي چڪو آهي. ڪاشف ولد محمد رشيد عمر 30 سال ۽ نظر ولد محمد ارشد عمر 35 سال 100 سيڪڙو سڙي ويا آھن، جن جي حالت ڳڻتي جوڳي آهي ان ڪري فوتين جو انگ وڌڻ جو خدشو آهي. واقعي واري ھنڌ مئير حيدرآباد ڪاشف علي شورو، ڊي سي حيدرآباد ۽ رينجرز جا اھلڪار پھتا ڄاڻ موجب ميئر حيدرآباد ڪاشف علي شورو جو لطيف آباد بي سيڪشن ٿاڻي جي حدن ۾ ڌماڪي جي هنڌ لطيف آباد ٿاڻي بي سيڪشن جي حد ۾ ڦٽاڪا فيڪٽري ۾ ٿيل افسوسناڪ ڌماڪي ۽ عمارت جي ٽٽڻ واري واقعي جي جاءِ جو هنگامي دورو ڪيو.  دوري دوران ميئر سرچ ۽ ريسڪيو آپريشن جو جائزو ورتو، ميئر ڪاشف علي شورو امدادي ڪمن ۾ مصروف اهلڪارن کان تفصيلي بريفنگ پڻ ورتي، جنهن موجب هن وقت تائين ملبو هٽائڻ دوران 6 شديد زخمي ماڻهن کي اسپتال منتقل ڪيو ويو آهي، جڏهن ته 6 ماڻهن جي فوت ٿيڻ جي تصديق ٿي چڪي آهي، ميئر زخمين کي فوري ۽ بهترين طبي امداد فراهم ڪرڻ لاءِ ڀٽائي ۽ سول اسپتال جي انتظاميه سان رابطو ڪري هدايتون جاري ڪيون ته ڪنهن به مريض جي علاج ۾ ڪا به ڪوتاهي نه ٿيڻ کپي. ميئر حيدرآباد واقعي جي مڪمل جاچ جو اعلان ڪندي هدايت ڪئي ته غير قانوني ۽ بغير حفاظتي انتظامن سان هلندڙ سمورين فيڪٽرين خلاف سخت قدم کنيا وڃن.