حيدرآباد ۾ ڪاسائين خلق کلائي ڇڏي: قرباني کان اڳ جانور رسا ڇڏائي ڀڄي ويا

حيدرآباد(رپورٽ: امتياز کوسو) حيدرآباد ۾ عيد جي ٽئين ڏهاڙي به جانورن جي قرباني وارو سلسلو جاري آهي، مختلف هنڌن تي جانور ڪاسائين کان رسا ڇڏي ڀڄي ويا جنهن تي ماڻهو کلي کلي کيرا ٿي پيا

سچل سرمست ڪاليج روڊ ڀرسان قرباني جو جانور ذبح ڪرڻ دوران اناڙي ڪاسائين خلق کلائي ڇڏي، قرباني واري جانور ذبح ٿيڻ مهل  ڪاسائين کي اڌ مئو ڪري ڇڏيو

سوشل ميڊيا تي وائرل ٿيل وڊيو ۾ نظر اچي ٿو ته ويڙهاڪ جانور کي وڻ سان ٻڌي اناڙي ڪاسائي کيس ذبح ڪرڻ جي ڪوشش ڪئي

ڪاسائين پاران ڳچي تي ڇري گهمائڻ سان جانور ڪاوڙ ۾ اچي رسو ٽوڙائي ڀڄي ٿو جنهن کي واپس آڻڻ لاءِ ڪاسائي، مالڪ توڙي ٻيا شهري وڏي تعداد ۾ پويان ڊوڙن ٿا پر ڪيتري دير تائين جانور کين پاڻ سان گڏ ڀڄائيندو رهي ٿو

جانور ڳچي ۾ ڇري گهمڻ بعد رت وهڻ کانپوءِ پاڻ ٿڪي پئي ٿو جنهن بعد ڪاسائي ٻيهر کيس اتي ئي رسن سان ٻڌي ذبح ڪرڻ جي ڪوشش ڪن ٿا

قرباني جي جانور توڙي شهرين جي ڊوڙ سبب خلق پريشان رهي جڏهن ته ڪيترائي شهري توڙي ٻار اهي منظر موبائل فون ۾ رڪارڊ ڪندا رهيا جيڪي بعد ۾ انهن سوشل ميڊيا تي وائرل ڪيا