خطي ۾ ڇڪتاڻ گهٽائي سفارتي عمل ڏانهن واپس اچڻ گهرجي: پاڪستان

باقو (م ڊ) پاڪستان جي نائب وزيراعظم ۽ پرڏيهي وزير سينيٽر محمد اسحاق ڊار شنگھائي تعاون تنظيم جي پرڏيهي وزيرن جي اجلاس جي موقعي تي ايراني پرڏيهي وزير سيد عباس عراقچي سان ملاقات ڪئي. ملاقات دوران، ٻنهي اڳواڻن پاڪستان ۽ ايران جي وچ ۾ ويجهن ۽ ڊگهي عرصي کان هلندڙ لاڳاپن جي تصديق ڪئي ۽ خطي جي موجوده صورتحال تي بحث ڪيو. تازين علائقائي تڪرارن تي گهري ڳڻتي جو اظهار ڪندي اسحاق ڊار پائيدار امن ۽ استحڪام لاءِ ڳالهين، تحمل، ڇڪتاڻ ۾ گهٽتائي ۽ سفارتي مصروفيت جي اهميت ۽ مفاهمت جي ياداشت (ايم او يو) تحت حاصل ڪيل ترقي کي اڳتي وڌائڻ جي ضرورت تي زور ڏنو. ايراني پرڏيهي وزير سيد عباس عراقچي پاڪستان جي مسلسل سفارتي مدد ۽ علائقائي امن ۽ سلامتي کي فروغ ڏيڻ ۾ تعميري ڪردار جي تعريف ڪئي. هن ايراني ماهيگيرن ۽ عملي جي ميمبرن جي محفوظ واپسي ۾ پاڪستان جي تعاون تي پڻ شڪريو ادا ڪيو. ٻنهي ڌرين باهمي دلچسپي جي معاملن تي ويجهي رابطي ۽ باقاعده صلاح مشورا جاري رکڻ تي اتفاق ڪيو ۽ علائقائي امن، استحڪام ۽ گڏيل خوشحالي لاءِ گڏجي ڪم ڪرڻ جي پنهنجي عزم کي ورجايو.