خيبرپختونخوا ۾ ليفٽيننٽ ڪرنل سميت 4 فوجي جوان شهيد، 3 دهشتگرد به مارجي ويا
نومبر 7, 2023
راولپنڊي (م ڊ) ڪي پي جي ضلعي خيبر ۾ دهشتگردن جي حملي ۾ ليفٽيننٽ ڪرنل سميت 4 فوجي جوان شهيد ٿي ويا جڏهن ته 3 دهشتگرد به مارجي ويا ۽ 3 زخمي ٿي ويا. آءِ ايس پي آر مڳجب خيبر پختونخواهه جي ضلعي خيبر جي وادي تيراه ۾ دهشتگردن سان فائرنگ جي ڏي وٺ ۾ ليفٽيننٽ ڪرنل سميت چار فوجي جوان شهيد ٿي ويا، جڏهن ته 3 دهشتگرد به مارجي ويا. آءِ ايس پي آر موجب 6 نومبر جي رات سيڪيورٽي فورسز دهشتگردن جي موجودگي جي اطلاع تي وادي تيراه ۾ آپريشن ڪيو. آپريشن دوران سيڪيورٽي فورسز ۽ دهشتگردن وچ ۾ فائرنگ جي سخت ڏي وٺ ٿي، جنهن ۾ قيادت ڪندڙ 43 ورهين جو ليفٽيننٽ ڪرنل محمد حسن حيدر شهيد ٿي ويو. آءِ ايس پي آر ٻڌايو ته فائرنگ جي ڏي وٺ ۾ نائيڪ خوش دل خان، رفيق خان، لانس نائيڪ عبدالقادر به شهادت ماڻي، جڏهن ته 3 دهشتگرد مارجي ويا ۽ 3 زخمي ٿيا. ترجمان موجب علائقي ۾ باقي دهشتگردن جي خاتمي لاءِ آپريشن جاري آهي، بهادر جوانن جون قربانيون اسان جي عزم کي وڌيڪ مستحڪم بڻائين ٿيون.
