خيرپور ۾ ميراٿن ريس ۾ ڌانڌلي جا الزام، رانديگرياڻين جو احتجاج، نفيسه شاهه آڏو چيٽر چيٽر جا نعرا، ناراض

خيرپور(رپورٽ: عرفان ڦلپوٽو) خيرپور ۾ حسن افروز وومين ميراٿن ريس دوران مختلف اسڪول جي شاگردياڻين انتظاميا تي سخت ڌانڌلين جا الزام هنيا. ريس مڪمل ٿيڻ ۽ پوزيشن هولڊر ڇوڪرين جا نالا ظاهر ٿيڻ بعد رانديگرياڻين شديد ناراضگي جو اظهار ڪيو. رانديگرياڻيون ريس مڪمل ٿيڻ بعد شهيد بينظير ڀٽو اوپن ايئر ٿيٽر ۾ موجود هيون، جتي جيئن ئي پ پ ايم اين اي ڊاڪٽر نفيسه شاهه داخل ٿي، تيئن ئي رانديگرياڻين طرفان “چيٽر چيٽر” جا نعرا هنيا ويا. ڊاڪٽر نفيسه شاهه طرفان سمجهائڻ ۽ کين خاموش ڪرائڻ جي ڪوششن باوجود نعريبازي جاري رهي، جنهن سبب هوءَ ناراض ٿي واپس رواني ٿي وئي. رانديگرياڻين ڊاڪٽر نفيسه شاهه جي گاڏي جو گهيرو ڪري شڪايتون ڪيون ته ريس دوران مبينا طور ڪجهه ڇوڪرين کي موٽر سائيڪلن ۽ ٻين گاڏين ذريعي وچ وارو فاصلو پار ڪرائي پوزيشن حاصل ڪرائي وئي، جڏهن ته اصل ۾ محنت ڪندڙ رانديگرياڻين سان ناانصافي ٿي آهي. رانديگرياڻين جي احتجاج ۽ انتظاميا خلاف نعريبازي سبب شام جو طئي ٿيل اختتامي تقريب پڻ منسوخ ڪئي وئي.