دنيا فلسطين جي ٻه رياستي حل لاءِ قدم کڻي: بلاول

ڪراچي(اسٽاف رپورٽر) پ پ چيئرمين بلاول ڀٽو زرداري چيو آهي ته عالمي برادري فلسطين جي ٻه رياستي حل لاءِ فيصلائتا قدم کڻي. فلسطيني عوام سان يڪجهتي جي عالمي ڏينهن جي موقعي تي بلاول ڀٽو زرداري چيو ته هاڻ عالمي برادري لاءِ اڻٽر ٿي چڪو آهي ته ٻه رياستي حل لاءِ قدم کڻي. هن چيو ته فلسطين کي پيش ايندڙ مصيبتون انسانيت جي اجتماعي ضمير تي گهرو زخم آهن، فلسطين تي جاري قبضي دوران هر معصوم جان ضايع ٿيڻ دنيا لاءِ هڪ سڏ آهي ته پنهنجو ڪردار ادا ڪري. سندس چوڻ هو ته پ پ سدائين فلسطيني عوام سان گڏ بيٺي آهي ۽ اڳتي به بيٺل رهندي، عالمي برادري عالمي قانونن جي پاسداري کي يقيني بڻائي.