دوا وٺڻ ويندڙ 4 ڀاتي روڊ حادثي ۾ فوت، معصوم ٻارڙو به شامل
جُولاءِ 14, 2023
نئون ديرو (رپورٽر) نئون ديرو ويجهو ٽرڪ ۽ موٽر سائيڪل ۾ ٽڪر سبب عورت ۽ معصوم ٻارڙي سميت 4 ڀاتي فوت ٿي ويا
ڳڙهي خدابخش ڀٽو ٿاڻي جي حد وسند شاخ وٽان انڊس هاءِ وي تي ٽرڪ جو موٽر سائيڪل سان ٽڪر ٿي پيو جنهن جي نتيجي ۾ عورت سندس ڀاءُ، پٽ ۽ ان جو 3 ڏينهن جي ڄاول پٽ فوت ٿي ويا
فوتين جي سڃاڻپ رتوديرو لڳ سيلرا ڳوٺ جا رهواسي طور ٿي آهي جن ۾ عورت منظوران سندس ڀاءُ 38 ورهين جو محمد چاڪر سيلرو، پٽ 30 ورهين جو محمد يوسف سيلرو ۽ 3 ڏينهن جو ڄاول معصوم ٻار شامل آهن
ٻڌايو پيو وڃي ته حادثي ۾ فوت ٿي ويل هڪ ئي ڪٽنب جا 4 ڀاتي ڳوٺ سيلرا کان لاڙڪاڻي دوا وٺڻ لاءِ وڃي رهيا هئا
فوتين جا لاش رتوديرو ڀرسان ڳوٺ سيلرا پهچايا ويا، هڪ ئي گهر جي 4 فوتين جا لاش گهر پهچڻ تي ماتم مچي ويو
ڳڙهي خدابخش ڀٽو ٿاڻي جي پوليس ٽرڪ تحويل ۾ وٺي ڊرائيور کي گرفتار ڪري ڳڙهي ٿاڻي جي لاڪپ حوالي ڪري ڇڏيو آهي
