راهول جنداوڙي جي قاتلن جي گرفتاري ۽ معصوم فدا نوناري جي بازيابي لاءِ سڪرنڊ ۾ ڌرڻا

سڪرنڊ (رپورٽ: نياز چانڊيو) سڪرنڊ ۾ 23 ڏينهن بيدري سان قتل ٿيل فرسٽ ايئر جي شاگرد راهول جنداوڙي جي قاتلن جي گرفتاري ۽ پهرين ڪلاس جي شاگرد فدا نوناري جي بازيابي لاءِ ڌرڻا، ان ڏس ۾ شاگرد راهول جنڊاوڙو جي گم ٿيڻ بعد لاش هٿ اچڻ واري واقعي ۽ پوليس پاران قاتلن کي گرفتار نه ڪرڻ خلاف جنڊاوڙا برادري جي عورتن مردن توڙي  سياسي ۽ سماجي ڌرين سڪرنڊ ٿاڻي آڏو مظاهرو ڪري ڌرڻو هنيو ويو. ان موقعي تي پوليس خلاف سخت نعريبازي ڪئي وئي. ڌرڻي ۾ راهول جنڊاوڙا جو پيءَ ٻيجل جنڊاوڙو، ماءَ استو جنڊاوڙو، شاعر مهر ڊٻائي ، شهري اتحاد جو صدر سانول ڪيريو ، نياز لاشاري ، ايس يو پي جو فلڪ شير اوڏ ، ايوب کوسو ،شمائله ڪيريو ، ايس ٽي پي جو شاهنواز ڪيريو ، سليم مگسي ، جسقم جو مصطفيٰ زنئور ، جي يو آئي جو عبدالقيوم چنا، جسم جو منور عمراڻي ، انڊس جو مجيد عباسي ،ڊاڪٽر پريم ، ڊاڪٽر صدورو ناز ڪيريو ،  هندو پنچائت جو راجيش ڪمار ، گوبند پپو سونارو ، ڊاڪٽر پريم  شريڪ ٿيا ان موقعي تي اڳواڻن چيو ته پوليس 23 ڏينهن گذرڻ باجود راهول جنڊاوڙو جا قاتل گرفتار ڪري ناهي سگهي، پوليس جي لاپرواهي سبب گم ٿيل نوجوان جو لاش مليو، هنن چيو ته حڪمران ڌر ۽ چونڊيل نمائنده خاموش تماشائي بڻيل آهن هنن چيو ته جوابدارن کي گرفتار نه ڪيو ويو ته جمعي 23 جنوري تي سڪرنڊ کان پيادل مارچ ڪري ڊي آءِ جي آفيس شهيد بينظيرآباد آڏو ڌرڻو هنيو ويندو، ٻئي طرف اي ايس پي در تابش مظاهرين سان ڳالهيون ڪري، هفتي جي مهلت وٺي احتجاج ختم ڪرايو، هوڏانهن سڪرنڊ مان  هڪ ڏينهن اڳ اغوا ٿيل پهرين ڪلاس جي شاگرد فدا حسين نوناري جي بازيابي لاءِ سندس جيجل ماءَ صدف نوناري ۽ والد نور محمد ڳوٺاڻن ۽ شهرين سان گڏ سڪرنڊ ٿاڻي جي مين گيٽ آڏو ڌرڻو هنيو. ان موقعي تي معصوم فدا حسين جي جيجل امڙ صدف نوناري ٻچي جي واپسي لاءِ اڀ ڏاريندڙ دانهون ڪندي چيو آهي ته خدارا مون کي پنهنجو ٻچو واپس ڪرائي ڏيو، هن چيو ته مون کي اڪيلو پٽ آهي، آئون هاڻ ٻچي کي تعليم ڪونه ڏياريندس بس مون کي صحيح سلامت ٻچو واپس ڪرائي ڏيو. هنن چيو ته 24 ڪلاڪن اندر معصوم بازياب نه ٿيو ته سڪرنڊ باءِ پاس کي بند ڪيو ويندو.  ٻئي طرف پ پ ايم پي غلام قادر چانڊيو چيو ته ايس ايس پي شبير سيٺار سان رابطو ٿيو آھي انشاءالله گم ٿيل فدا نوناري بازياب ڪرايو ويندو .