| زندگيءَ کان تنگ آهيان: ڀٽ شاهه ۾ پيرسن ٿنڀي تي چڙهي ويو |
ڀٽ شاهه (ن پ ا) ڀٽ شاھ ۾ زندگي کان تنگ پيرسن شخص بجلي جي 11 هزار وولٽيج ٿنڀي تي چڙهي ويو ،ڳوٺ شير خان ملوکاڻي سان تعلق رکندڙ پيرسن بشير ملوکاڻي شهر جي مک دنبورا چوڪ ڀرسان اوچتو بجلي جي ٿنڀي تي چڙهي ويهي رهيو،شهرين جو وڏو انگ جمع ٿي ويو، پوليس ۽ واپڊا ملازمن پاران پيرسن کي هيٺ لاهڻ جي ڪوشش ڪئي وئي پر پيرسن شخص پاران ڪجهه به ڳالهائڻ ۽ هيٺ لهڻ کان انڪار ڪندي بجلي جي تارن ۾ هٿ وجهي ويهي رهيو، پيرسن شخص جي ڀاءُ نظير ملوکاڻي جو چوڻ هو ته ڀاء بشير ملوکاڻي گهران ڪاوڙجي نڪتو آهي. ذهني توازن به درست نه اٿس، ڪافي علاج ڪرايو آهي خودڪشي جي ڪوشش ڪري رهيو آهي، پيرسن شخص بشير ملوکاڻي بجلي جي تارن تي ويهي ماڻهن کي ڏسندو رهيو، ڪافي دير کان پوليس ۽ واپڊا ملازمن جي ڪوششن سان پيرسن شخص کي بجلي جي ٿنڀي تان هيٺ لاٿو ويو، جتي خودڪشي جي ڪوشش ڪندڙ شخص جو ايترو چوڻ هو ته گهرو پريشانين سبب مجبوري مان پاڻ کي مارڻ چاهيان ٿو، گهر وارا پريشان ڪندا رهن ٿا، انهن کان تنگ ٿي ٿنڀي تي چڙهيو آهيان، جنهن بعد پوليس خودڪشي جي ڪوشش ڪندڙ شخص کي پاڻ سان گڏ کڻي وئي ۽ ٿاڻي تي وڃڻ بعد پيرسن کي وارثن حوالي ڪيو ويو، وارثن جو چوڻ هو ته ڪافي وقت کان ذهني توازن خراب ٿي ويو اٿس، تمام گهڻو علاج ڪرايو آهي مگر ڪو فرق نه پيو آهي اڳ ۾ به خودڪشي جي ڪوشش ڪري چڪو آهي شادي شده آهي معصوم ٻار به اٿس، هاڻي ٻيهر وري ڪنهن سٺي ڊاڪٽر کي ڏيکارينداسين.