زندگي بچائڻ واريون دوائون عوامي مسئلو آهي، حڪومت رجسٽريشن ۽ دستيابي جو جائزو وٺي:آئيني عدالت

اسلام آباد(بيورو رپورٽ) وفاقي آئيني عدالت ۾ زندگي بچائڻ وارين دوائن بابت ڪيس جي ٻڌڻي، درخواستگذار طرفان 41 دوائن جي رجسٽريشن ۽ دستيابي بابت معلومات ويب سائيٽ تي اپڊيٽ ڪرڻ جي استدعا ڪري ڇڏي. عدالت ڊريپ کان رپورٽ طلب ڪندي ٻڌڻي غير معينه مدت تائين ملتوي ڪري ڇڏي، وفاقي آئيني عدالت ۾ زندگي بچائڻ واري دوائن بابت چيف جسٽس امين الدين خان جي سربراهي ۾ ٽه رڪني بئنچ ٻڌڻي ڪئي. درخواستگذار ٻڌايو ته 41 دوائن جي رجسٽريشن بابت درخواست ڏنل آهي، جن مان 30 دوائون ته رجسٽرڊ ٿي چڪيون آهن، پر ڪيترين دوائن جي دستيابي اڃا تائين ويب سائيٽ تي ظاهر ناهي، تنهنڪري هدايت ڏني وڃي ته معلومات فوري طور تي اپڊيٽ ڪئي وڃي، ٻڌڻي دوران ايڊيشنل اٽارني جنرل عامر رحمان پيش ٿيو. چيـف جسٽس ريمارڪس ڏنا ته اهو عوامي مفاد جو ڪيس آهي ۽ حڪومت کي دوائن جي فراهمي جو جائزو وٺي. ڊريپ جي وڪيل عدالت کي ٻڌايو ته ڪجهه دوائن جون قيمتون ڪنٽرول ٿي رهيون آهن، ۽ زندگي بچائڻ وارين دوائن جي ڄاڻ ويب سائيٽ تي موجود آهن، عدالت ڊريپ کان دوائن جي دستيابي بابت تفصيلي رپورٽ طلب ڪري ورتي ۽ ڪيس جي ٻڌڻي غير معينه مدت تائين ملتوي ڪري ڇڏي.