زيادتي بعد قتل ٿي؟ شهدادپور ۾ گم ٿيل نينگري جو ويران جڳهه تان لاش هٿ

شھدادپور (رپورٽر) شھدادپورڀرسان ڳوٺ خان رند ۾ گذريل ڏينهن کان گم ٿيل  نينگري زھرا ڪنڀر جو لاش گلشن مھر ڪالوني ۾ ويران جڳھه مان هٿ آيو آهي

علائقي واسين جي اطلاع تي پوليس پهچي مڙھه تحويل ۾ وٺي پوسٽ مارٽم لاءِ اسپتال منتقل ڪري ڇڏيو

نينگري جي والد علي گل ڪنڀر ٻڌايو ته نينگري گذريل ڏينهن لاپتا ٿي وئي هئي، ڪافي ڳولا ڪئي وئي پر هٿ نه آئي اڄ سندس لاش مليو آهي

علي ڪنڀر چيو ته خدشو اٿم ته ڌي کي گهٽا ڏئي قتل ڪيو ويو آهي، پوليس موجب نينگري گم هئي، لڳي ٿو جنسي زيادتي بعد نينگري کي قتل ڪيو ويو آهي

ڊي ايس پي ايوب بروهي طرفان واردات واري جاءِ جو معائنو ڪيو ويو آهي جڏهن ته معاملي جي جاچ لاءِ جيوفينسنگ ٽيم واقعي واري طلب ڪئي وئي آهي

پوليس موجب شفاف جاچ ڪئي ويندي ۽ جديد ٽيڪنالاجي استعمال ڪري جوابدار گرفتار ڪيا ويندا

پوليس موجب پوسٽ مارٽم ڪرائڻ بعد وارثن جي فرياد تي ڪيس داخل ڪيو ويندو، واقعي بعد وارثن ۾ ڪهرام متل آهي جڏهن ته علائقي ۾ خوف ڇانيل آهي