| سانگھڙ ۾ اجتماعي زيادتي ڪيس جي پنج جوابدارن کي جنم ٽيپ |
سانگهڙ (رپورٽر) سانگهڙ جي عدالت ڏهه مهينا اڳ پيش آيل گينگ ريپ ڪيس جو فيصلو ٻڌائي ڇڏيو آهي. زيادتي ڪيس ۾ ملوث پنجن جوابدارن کي عمر قيد جي سزا ٻڌائي وئي آهي، جڏهن ته هر هڪ تي ٻه ٻه لک رپيا ڏنڊ پڻ لاڳو ڪيو ويو آهي. سانگهڙ ڪورٽ جي فرسٽ ايڊيشنل اينڊ سيشن جج غلام قادر تنيو پوليس ٿاڻي منگلي تي داخل ڪيل گينگ ريپ ڪيس رم نمبر 39/2022، قلم 375-اي جو فيصلو ٻڌايو. عدالت ڏوهه ثابت ٿيڻ تي پنجن جوابدارن شاهه عالم پٺاڻ، الهدنو ابوپٽو، محمد آصف بروهي، اڪرام بروهي ۽ شهباز پٺاڻ کي عمر قيد جي سزا ۽ جرمانو ٻڌايو. ڪيس جي مڪمل پيروي سرڪاري وڪيل جمال الدين بالاڊي ڪئي. سانگهڙ جي ڀرپاسي واري علائقي منگلي ٿاڻي تي ڏهه مهينا اڳ زاهده پروين نالي عورت انهن سڀني جوابدارن خلاف گينگ ريپ جو ڪيس داخل ڪرايو هو. ڪالهه عدالت سڀني جوابدارن کي عمر قيد جي سزا ٻڌائي آهي. جرمانو ادا نه ڪرڻ جي صورت ۾ وڌيڪ سزا ڀوڳڻي پوندي.