سروري سرهاڻ جي تنظيم سازي، نوان عهديدار مقرر

ڄامشورو(رپورٽر) سروري تنظيم جي باني چيئرمين ۽ سروري سرهاڻ تنظيم جي چيئرمين مخدوم سعيد الزمان ”عاطف“ سروري سرهاڻ تنظيم جي تنظيم سازي کي وڌيڪ فعال، منظم ۽ اثرائتو بڻائڻ لاءِ نوان عهديدارمقرر ڪيا ويا آهن جن ۾ مرڪزي سيڪريٽري اطلاعات گل حسن درس، صوبائي سنڌ  سيڪريٽري اطلاعات نور سنڌي، ڪراچي ڊويزن جي صدر پير نور الحسن ۽ ضلعي ملير جي صدر پير مسعود زمان کي مقرر ڪيو ويو آهي. ان موقعي تي مخدوم سعيد الزمان ”عاطف“ چيو ته سروري سرهاڻ تنظيم عوامي خدمت، سماجي ڀلائي، اخلاقي قدرن جي واڌ ويجهه ۽ سماجي مسئلن جي حل لاءِ پرعزم آهي. پاڻ وڌيڪ چيو ته نون عهديدارن جي مقرري سان تنظيم جي ڪارڪردگي وڌيڪ بهتر ٿيندي ۽ تنظيمي ڍانچو مضبوط ٿيندو. مخدوم صاحب چيو ته باقي عهديدارن جون مقرريون جلد ڪيون وينديون ته جيئن تنظيم کي ضلعي، ڊويزنل ۽ صوبائي سطح تي وڌيڪ مؤثر بڻائي سگهجي. مخدوم سعيد الزمان ”عاطف“ نون مقرر ڪيل عهديدارن لاءِ نيڪ تمنائن جو اظهار ڪندي اميد ظاهر ڪئي ته هو سروري سرهاڻ تنظيم جي مقصدن، اصولن ۽ ويزن کي اڳتي وڌائڻ ۾ ڀرپور ڪردار ادا ڪندا ۽ سماج جي ڀلائي لاءِ پنهنجون ذميواريون ايمانداري سان نڀائيندا.