سنڌ جي قومپرستن امڪاني 27هين آئيني ترميم کي مڪمل طور رد ڪري ڇڏيو: سنڌ ايڪشن ڪاميٽي بحال

ڄامشورو(رپورٽ: ميرمرتضيٰ نوحاڻي) جي ايم سيد ايڊيفس ڄامشورو تي سنڌ جي قومپرستن ۽ سنڌ جي گهڻ گهرن جي گڏجاڻي سنڌ يونائيٽيڊ پارٽي جي ميزباني ۾ سڏرائي وئي، جنهن ۾ جنهن ۾ ميزباني سنڌ يونائيٽيڊ پارٽي جي صدر سيد زين شاهه کان علاوه جيئي سنڌ محاذ جي رياض چانڊيو، جسقم شھيد بشير خان جي ڊاڪٽر نياز ڪالاڻي، جيئي سنڌ قومي پارٽي جي نواز خان زئور، پورهيت مزاحمت تحريڪ جي سيد مسرور شاھه، عوامي جمهوري پارٽي جي نور نبي راهوجو، جسقم بشير خان جي مرڪزي ترجمان ديدار شام، سنڌ صوفي فورم جي ڊاڪٽر بدر چنا، قومي عوامي تحريڪ جي الطاف خاصخيلي، نيشنل پارٽي سنڌ جي تاج مري، علامه اياز قمي، ايڊووڪيٽ ڪي بي لغاري، پروفيسر مشتاق ميراڻي، روشن علي ٻرڙو ۽ ٻين شرڪت ڪئي. اجلاس ۾ امڪاني 27هين آئيني ترميم کي مڪمل طور تي رد ڪيو ويو ۽ ان کي سنڌ کپائڻ، سنڌ ورهائڻ ۽ عدالتي نظام کي مڪمل طور تباھ ڪرڻ جو منصوبو قرار ڏنو ويو . سمورن سنڌ دوست جماعتن انهيءَ ڳالهه تي اتفاق ڪيو ته پيپلزپارٽي سنڌ جي وحدت، وسيلن ۽ عدالتي نظام جي خاتمي جي ذميوار آهي، اجلاس ۾ سنڌ ايڪشن ڪميٽي کي بحال ڪيو ويو ۽ فيصلو ڪيو ويو ته سنڌ جي قومي مفادن جي حاصلات لاءِ سنڌ ايڪشن ڪميٽي جي پئليٽ فارم تي جدوجھد ڪئي ويندي، جنهن جو سربراهي اجلاس 17 نومبر تي رکيو ويو آهي، جنهن ۾ سمورن سنڌ دوست پارٽين کي دعوت ڏني ويندي. اجلاس ۾ فيصلو ڪيو ويو ته 27هين آئيني ترميم خلاف تحريڪ جو آغاز ڪيون ٿا جنهن خلاف 11 نومبر تي سڄي سنڌ ۾ سنڌ کپائڻ، سنڌ ورهائڻ ۽ عدالتي نظام جي خاتمي جي عنوان هيٺ سڄي سنڌ جي ضلعي هيڊڪواٽرن ۾ڀرپور احتجاجي مظاهرا ڪيا ويندا اڳواڻ ميڊيا سان ڳالهائيندي چيو ته ملڪ جي موجوده حڪومت 27هين آئيني ترميم ذريعي ملڪ جي پارلياماني نظام ۽ صوبن جي خودمختياريءَ، ناڻي تي قبضو ۽ جاگرافي حدن سان ھٿ چراند ڪئي پئي وڃي، جنهن کي ڪنهن به صورت ۾ قبول نه ڪيو ويندو ۽ احتجاجي تحريڪ جاري رکي ويندي.